Anxo, usuario de Down Vigo, novo operario de produción de Nueva Pescanova
Down Vigo e Fundación Vodafone España presentaron onte na Cámara de Comercio de Vigo “H@ppy Day”, unha iniciativa cuxo obxectivo é concienciar a empresarios e á sociedade en xeral dos beneficios da inserción laboral das persoas con síndrome de Down. Na presentación tomaron parte representantes do tecido empresarial de Vigo, así como persoas usuarias de Down Vigo, que contaron as súas experiencias poñendo de manifesto os beneficios que achegan as persoas con discapacidade intelectual no traballo. Empregados e empregadores alentaron a outros empresarios a contratar a persoas con discapacidade intelectual e a comprobar as vantaxes sociais e produtivas que se obteñen ao darlles unha oportunidade nunha empresa ordinaria. No acto interviñeron a delegada de Estado no Consorcio Zona Franca de Vigo, Teresa Pedrosa; a concelleira do Concello de Vigo, Mª Jesús Lago; o xerente da Cámara de Comercio de Vigo, José Manuel García; o responsable de Administracións Públicas en Galicia de Vodafone España, Jesús Sueiro; o presidente de Down Vigo, Fernando Molina; a responsable de emprego de Down Vigo, Eva Alonso; e os responsables das empresas Atendo e Reydel, Luís Barros e Óscar Failde. O programa “Yo me prep@ro” O obxectivo do programa “Yo me prep@ro” é proporcionar ás persoas con discapacidade intelectual as ferramentas e estratexias necesarias para facilitar o seu acceso ao emprego, a través da formación en tecnoloxías da información e a comunicación. Grazas a este programa, 32 usuarios de Down Vigo están a recibir formación prelaboral en Novas Tecnoloxías.
Entradas relacionadas
