José Manuel Rey Varela, titular da Consellería de Política Social, e Coro Piñeiro, Directora Xeral de Maiores e Persoas con Discapacidade, visitaron na mañá de onte a sede da organización Down Galicia en Santiago de Compostela. O responsable da Consellería de Política Social mantivo un encontro de traballo con Delmiro Prieto e Elías Ledo, Presidente e Secretario da Federación Down Galicia, con Sonia Caldas, xerente da Federación, e con Marta Rodríguez, directora da Asociación Down Compostela. Nesta reunión o Conselleiro puido coñecer de primeira man os proxectos e necesidades da organización e tratou varios temas que preocupan ós representantes da Federación. Rey Varela adquiriu o compromiso de explorar novas vías de colaboración coa entidade para acadar “unha mellora da integración e da igualdade das persoas coa síndrome de Down que reverta na mellora da calidade de vida de estes e das súas familias”. Con ocasión deste encontro, o Conselleiro puido saudar aos usuarios e usuarias que se atopaban na sede nese momento. O centro presta asistencia a persoas coa síndrome de Down de todas as idades, principalmente de entre 15 e 25 anos.