Os IV Proyectos Impulso, iniciativa que se engloba na política de Responsabilidade Corporativa do Popular, premian con 23.000€ o proxecto “Potenciando o talento profesional: inclusión laboral de persoas coa Síndrome de Down e/ou discapacidade intelectual” de Down Galicia.

Este proxecto púxose en marcha no ano 2.002 e está orientado a facilitar que as persoas con discapacidade teñan un traballo en empresas ordinarias. Para que estas insercións sexan efectivas cóntase coa figura dun preparador ou preparadora laboral (profesional que se encarga de ensinar as tarefas á persoa con discapacidade no  posto de traballo), e que non supón custe algún para a empresa. Este tipo de apoio no posto é gradual e vaise retirando ata desaparecer por completo a medida que a persoa con discapacidade vai adquirindo autonomía nas súas tarefas.

Potenciar o emprego das persoas con discapacidade para favorecer o seu acceso laboral e facer efectivo o principio de igualdade de oportunidades é o principal obxectivo de Proyectos Impulso que, na súa cuarta convocatoria, premiou tamén á Confederación Gallega de Personas con Discapacidad (C.O.G.A.M.I.) e á Fundación Ampans.

O acto de entrega dos premios tivo lugar o pasado 30 de novembro, no Edificio Beatriz de Madrid, ó que asistiron, por parte do Popular, Luis Alberto Carpizo, Responsabilidade Corporativa, e Sara López, Directora da Oficina do Accionista. Por parte da Fundación Konecta, encargada da Secretaría Técnica da convocatoria, así como da análise das propostas e a preselección dos finalistas, acudiron a súa Directora, Graciela de la Morena, e Olivia Salido, Coordinadora do proxecto.