A Federación Down Galicia converteuse o pasado xoves nun dos finalistas da II edición do Premio Mutualista Solidario que entrega a Fundación A.M.A. Este galardón, dotado con 5.000 euros, premia o seu proxecto “Atención temperá para nenas e nenos coa síndrome de Down”, cuxo obxectivo principal é ofrecer ás persoas coa síndrome de Down e ás súas familias un conxunto de accións que faciliten a súa adecuada maduración en todos os ámbitos e que lles permitan conseguir o máximo nivel de desenvolvemento persoal e de inclusión. No mesmo certame, o Padroado da Fundación A.M.A. declarou gañador desta  II edición do Premio Mutualista Solidario ao proxecto Las Casitas, da santiaguesa Fundación Andrea. Os 12.000 euros do galardón empregaranse integramente para desenvolver o devandito proxecto, que ofrece fogar e manutención a familias de escasos recursos con nenos hospitalizados de longa estancia no Complexo Hospitalario Universitario de Santiago, CHUS. O segundo premio, cunha dotación de 8.000 euros, recaeu en Médicos del Mundo, polo seu proxecto de prevención da mutilación xenital feminina entre nenas e mulleres de orixe subsahariana residentes en España. Os candidatos aos Premios “Mutualista Solidario” son propostos polos mutualistas de A.M.A., a Mutua dos Profesionais Sanitarios, a través da Fundación A.M.A.. Unha vez recibidos todos os proxectos e co asesoramento da Fundación Lealtad, a Fundación A.M.A. seleccionou un total de 78 proxectos solidarios, de entre os cales o Padroado da Fundación A.M.A. seleccionou aos dez gañadores. O doutor Diego Murillo, presidente da Fundación A.M.A., entregou onte os premios a Charo Barca, presidenta da Fundación Andrea, e a Sagrario Martín, presidenta de Médicos del Mundo. Os requisitos para optar ao premio son que o proxecto sexa presentado por un mutualista de A.M.A. e que os seus programas se centren en colectivos en risco de exclusión social, e inclúan actividades relacionadas co coidado da saúde, a prevención de enfermidades ou a promoción de hábitos de vida saudables. Cada proposta debeu incluír ademais un orzamento detallado por partidas e conceptos, e executarse integramente en España. O Padroado designou tamén como finalistas do certame, á Asociación de prevención y de víctimas de accidentes Aesleme, polo proxecto “Te puede pasar”; á Asociación de Esclerosis Múltiple de Navarra, Ademna, polo seu proxecto “Superando límites”; e á asociación Aspanion, polo seu proxecto de “Terapia para niños y adolescentes con cáncer y sus familias”. Quedaron tamén finalistas a Federación de Asociaciones de Familiares y Personas con Enfermedad Mental de Castilla y León, Feafes CyL, polo seu proxecto de “Prevención del envejecimiento”; a Fundación Aspanias Burgos, co seu proxecto de “Equipamiento y formación en reanimación”; a Fundación de Ayuda y Desarrollo en Educación, FADE, polo seu proxecto “Secunda”, de voluntariado sociosanitario con maiores, e Taxus Sierra Norte, polo seu proxecto “Emociones”, que busca activar a memoria musical e a capacidade emotiva entre enfermos de Alzheimer. Foto: Fundación A.M.A.