As entidades sociais continuarán pechadas ata que a Xunta de Galicia considere viable a súa reapertura
No pasado exercicio 2015, un total de 108 persoas coa síndrome de Down e/ou discapacidade intelectual participantes no programa de emprego de Down Galicia tiveron a ocasión de traballar en empresas ordinarias da súa contorna. Grazas a estas oportunidades, os traballadores e traballadoras puideron adquirir experiencia en postos tan variados como auxiliar de oficina, peón de obras, conserxe, camareiro ou especialista na sección de electricidade dunha empresa de automoción, entre outros. Por localidades, na zona de Vigo foron 41 as persoas que traballaron neste ano 2015, 14 en Compostela e Pontevedra, 12 en A Coruña, 10 en Ferrol, 9 en Lugo e 8 en Ourense. Sen embargo, estas 108 persoas asinaron un total de 136 contratos, o que dá conta de que a inestabilidade e a temporalidade nas contratacións seguen a ser os principais atrancos na inserción laboral das persoas con discapacidade intelectual. Destaca tamén o elevado número de prácticas laborais realizadas polos usuarios e usuarias das entidades Down en Galicia -un total de 79-, coas que reforzan a súa motivación cara o emprego e melloran as súas habilidades socio-laborais. A metodoloxía Emprego con Apoio Desde o ano 2.002, as entidades Down en Galicia desenvolven o programa Emprego con Apoio, deseñado para atender especificamente as necesidades e barreiras que as persoas coa síndrome de Down e/ou discapacidade intelectual atopan á hora de intentar acceder ao mercado laboral ordinario. Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un posto, contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros e compañeiras de traballo e na mediación na relación con eles para que se desenvolva de xeito positivo e natural. Paralelamente, as entidades Down realizan un labor de prospección laboral co fin de dar a coñecer esta iniciativa entre o tecido empresarial e acadar a súa colaboración por medio de contratos e/ou prácticas laborais. Neste sentido, a participación e a cada vez maior presenza das persoas con discapacidade intelectual nas empresas ordinarias contribúe de xeito eficaz a desterrar os tópicos que tradicionalmente se lles atribúen a este colectivo, resultando un xeito sumamente eficaz de inclusión social.
Entradas relacionadas
