Anxo, usuario de Down Vigo, novo operario de produción de Nueva Pescanova
A Directora xeral de Xuventude, Participación e Voluntariado, Cecilia Vázquez, entregou onte a oito mozos e mozas de entre 18 e 30 anos a certificación oficial do proxecto de voluntariado xuvenil de apoio á vida independente realizado en Down Vigo. Trátase dun programa que facilitou aos asociados da entidade o proceso de aprendizaxe de habilidades para poder emanciparse. Galicia é a única comunidade autónoma que, seguindo o modelo europeo, certifica a experiencia voluntaria, unha das grandes novidades e vantaxes que se recolle na Lei de Acción Voluntaria de Galicia, o marco lexislativo para o voluntariado que aprobou por unanimidade a Parlamento de Galicia en novembro de 2011. A Consellería de Política Social achegou 4.800 euros para este proxecto a través do Servizo de Voluntariado Xuvenil. Un programa que, segundo Cecilia Vázquez, “é pioneiro en toda España onde se conxungan os beneficios da acción voluntaria, como a solidariedade, a sensibilización cos máis vulnerables ou o compromiso coa sociedade, coa importancia que para os propios mozos e mozas ten participar nesta experiencia de educación non formal”. En 2015 o Servizo de Voluntariado Xuvenil incorporou en toda Galicia a 830 mozos e mozas como voluntarios en 128 proxectos de entidades de acción voluntaria e concellos, cun investimento global de 500.000 euros. Na cidade de Vigo, o Voluntariado Xuvenil desenvolveu un total de sete proxectos nos que participaron 50 voluntarios. No que se refire ao total da provincia de Pontevedra, os proxectos executados foron 22 e os voluntarios xuvenís, 148. As actividades prioritarias do Servizo de Voluntariado Xuvenil foron as de recuperación da cultura, arte e tradicións populares; as actividades con colectivos en situación de risco, colectivos xuvenís ou relacionadas coa igualdade de xénero; os programas de voluntariado no ámbito familiar e os de colaboración nos trazados xacobeos.
Entradas relacionadas
