Down Galicia e Clece alíanse para promover a inclusión laboral das persoas con discapacidade intelectual
Esta mañá Down Pontevedra “Xuntos” e Fundación Vodafone España presentaron no Pazo Mugartegui de Pontevedra “H@ppy Day”, unha iniciativa cuxo obxectivo é concienciar ao empresariado e a sociedade sobre os beneficios da inserción laboral das persoas coa síndrome de Down e/ou Discapacidade Intelectual. Na presentación tomaron parte representantes do tecido empresarial de Pontevedra, así como usuarios/as de Down Pontevedra “Xuntos” que conseguiron un posto de traballo a través do programa de formación prelaboral “Yo me prep@ro”. Todos eles contaron as súas experiencias, alentando a outros/as empresarios/as a contratar a persoas con discapacidade intelectual e a que comproben as vantaxes sociais e produtivas que se obteñen ao darlles unha oportunidade na empresa normalizada. No acto interviñeron: Manuel Pérez Cabo, presidente da Asociación Down Pontevedra “Xuntos”; Carmen Fouces, Concelleira de Benestar Social, Digna Rosa Rivas Gómez, Deputada de Cohesión social e xuventude; José Suárez, responsable de Administración Pública de Vodafone en Galicia; José Luís Buján, representante de Ucalsa-Pontevedra; Enrique Domínguez Munaiz, director deportivo/adestrador do equipo Teucro Liga Asobal; Verónica Rosales Patiño, empregada da empresa Ucalsa e Pizza Móvil; Miguel Pérez Fernández, empregado do Centro de Recuperación Torrado e formación en masaxe deportivo no Teucro. Ambos participantes na II Edición do programa “Yo me prep@ro”. O programa “Yo me prep@ro” O obxectivo do proxecto “Yo me prep@ro” é proporcionar ás persoas con discapacidade intelectual as ferramentas e estratexias necesarias para facilitarlles o acceso ao emprego, a través das diferentes tecnoloxías implantadas na sociedade: acceso a Internet, uso do computador, acceso a redes bancarias informatizadas, comunicación a través da telefonía móbil ou fixa, realizar consultas en organismos públicos, programación e uso da televisión e DVD, etc. Grazas ao programa “Yo me prep@ro” están recibindo formación prelaboral en Novas Tecnoloxías 16 usuarios/as de DOWN PONTEVEDRA “XUNTOS”. Na I edición do programa formáronse tamén 20 usuarios dos cales 7 conseguiron un contrato laboral. A nivel nacional o proxecto completou a súa I edición (2014-2015) con gran éxito pois superou as expectativas tanto no número de prácticas laborais conseguidas como na cifra de contratacións laborais, alcanzando os 72 contratos de traballo. Na segunda edición do curso, que concluirá este mes de abril, reciben esta formación en Novas Tecnoloxías un total de 240 usuarios de toda España a través de 15 cursos, cun total de 10.500 horas lectivas. O programa de formación desenvolverase en dous niveis: un de iniciación e outro de profesionalización, ambos dun ano de duración. O nivel de profesionalización comprende tamén prácticas en contornas laborais cuxo obxectivo é conseguir a inserción laboral.
Entradas relacionadas
