As persoas coa síndrome de Down reclaman os seus dereitos con motivo do Día Mundial desta alteración cromosómica
A Xunta de Galicia convocou hoxe as primeiras oposicións para persoas con discapacidade intelectual, tal como aparece publicado no Diario Oficial de Galicia (DOG). Ademais, o conselleiro de Facenda, Valeriano Martínez, asinou hoxe un acordo con representantes de Down Galicia e da Federación galega de asociacións a favor das persoas con discapacidade Intelectual ou do desenvolvemento (Fademga) para facilitar a entrada deste colectivo na Xunta. O DOG recolle hoxe a convocatoria de oposicións para a cobertura de 6 prazas de persoal subalterno, e será a primeira dirixida ao colectivo da discapacidade intelectual que realiza a Xunta de Galicia en toda a súa historia. Ademais, estas seis prazas únense ás 33 prazas que se inclúen na Oferta de Emprego Público para este ano 2016, publicada tamén hoxe no DOG. Destas 33 prazas, 17 son para celadores do Sergas, 12 para funcionarios subalternos e 4 para o corpo auxiliar (grupo C2). Na convocatoria publicada hoxe, a puntuación dos aspirantes que aproben o primeiro exercicio pero non superen o proceso selectivo terá a consideración de mérito nas futuras listas de emprego temporal para persoas con discapacidade intelectual que vai impulsar a Xunta de Galicia. De feito, a Administración galega será pioneira en poñer en marcha unha lista de contratación temporal dirixida especificamente a este colectivo. Formación específica para adaptarse ao posto Tal como recolle o convenio asinado hoxe, a Administración galega realizará actuacións que faciliten a adaptación ao entorno laboral das persoas con discapacidade. A colaboración engloba tanto accións de formación e orientación sociolaboral previas ao ingreso ou no ano de inicio da prestación de servizos na Administración galega, como accións de apoio ao desenvolvemento nos posto de traballo ao longo da súa carreira profesional. Entre as actuacións máis relevantes que se levarán a cabo están a realización de cursos de formación específicos previos ao ingreso na Administración da Comunidade Autónoma, que serán impartidos por persoal da Xunta co apoio do persoal das dúas asociacións. Prestarase tamén apoio no proceso de inserción e adaptación efectiva ao posto de traballo e ao entorno laboral dos traballadores con discapacidade intelectual. Ademais, levarase a cabo un seguimento do desempeño da actividade laboral que incluirá formación continua en competencias instrumentais, transversais e laborais para este colectivo. Finalmente, o acordo inclúe a realización de talleres prácticos de intercambios de experiencias dirixidos ao persoal que realiza funcións de referencia no entorno de traballo das persoas con discapacidade. As asociacións Down Galicia e Fademga teñen como finalidade coordinar, apoiar e impulsar a mellora da calidade de vida das persoas con síndrome de down e discapacidade intelectual e das súas familias a través de plena inclusión social e da utilización dos recursos da Comunidade. Ademais, traballan en promover proxectos de integración escolar, laboral e social; promover a autonomía persoal das persoas con discapacidade; e favorecer a súa inclusión social e todas as etapas da vida.
Entradas relacionadas
