A compañía galega de distribución alimentaria Vegalsa-Eroski presentou hoxe na Coruña a súa nova marca “We, a alegría da horta”, coa que comercializará verdura cultivada na comunidade para promover a capacitación e inserción laboral de persoas con discapacidade intelectual. A iniciativa, que se pon en marcha nas fruterías dos 99 supermercados Eroski/Center de Galicia, conta coa colaboración da Asociación Down Coruña, a empresa Hortalizas Roberto López e a Escola Politécnica Superior de Enxeñería Agrónoma da Universidade de Santiago (USC), así como a Asociación de Terapia Hortícola Aethores. Acelgas, verzas, espinacas, grelo fino, perexil e xenos son as verduras que se comercializarán baixo esta nova marca, coa que o chef Luís Veira, Estrela Michelín, realizou este mediodía no Eroski/Center de Matogrande unha exhibición sobre a preparación de produtos galegos cun licuado de mazá con perexil, un snack de ensalada césar ou un chupito de chourizo con queixo cremoso. O cociñeiro coruñés explicou que esta é unha aposta por “produtores, produtos e sociedade diversa galega” que reflicte ademais unha “Galicia en estado puro”, neste caso cun novo modelo de horta. “Gústanos traballar na innovación e a vangarda”. As verduras da marca “We, a alegría da horta” saben “a compromiso, a ilusión e a superación persoal”, destacou Florentino Vázquez, director dos Eroski/Center de Galicia, durante a presentación desta marca, cuxos produtos contarán etiquetas propias nas que se resaltará a orixe 100% galego, pois proceden das localidades coruñesas de Laracha e Arteixo. Estas verduras proceden da primeira colleita dos alumnos que participan nesta iniciativa e que son para Gabriela González, directora de Responsabilidade Social Corporativa de Vegalsa-Eroski, un “exemplo de superación”, idea que compartiu Tomás Custa, director da escola politécnica da USC participante nesta campaña. Para Manuel Álvarez, presidente de Down Coruña, “os nosos rapaces unha vez máis demostraron que son capaces”, polo que pediu non pecharlles esta porta que se abriu coa posta en marcha dun compromiso de contratación. O conselleiro de Política Social, José Manuel Rey, que pechou as intervencións de presentación destes produtos “cun verniz de solidariedade”, destacou que “as persoas con discapacidade intelectual son un colectivo importantísimo para a nosa sociedade por todo o que achegan á mesma” e subliñou que a Xunta aposta pola “eliminación de todo tipo de barreiras”. Axencia EFE