O programa de Atención temperá de Down Galicia, unha das metas do 3º Solidarios non stop de BBVA AM
O IV Congreso Iberoamericano sobre síndrome de Down, organizado por FIADOWN, DOWN ESPAÑA e o INICO da Universidade de Salamanca, contará con algúns dos maiores especialistas nesta discapacidade procedentes de España, Estados Unidos, México ou Arxentina, entre outros países. Esta cuarta edición, que se celebrará en Salamanca do 16 ó 18 de marzo de 2016, ten por obxectivo aportar unha idea actualizada da situación e necesidades das persoas coa síndrome de Down e proporcionar referencias de investigación capaces de orientar os apoios ás persoas con esta discapacidade, as súas familias e institucións relacionadas. Down Galicia participará neste congreso cunha comunicación que leva por título “O camiño de Down Galicia”, na que se abordará o traxecto percorrido pola Federación e a Universidade de Vic durante o proceso de formación e asesoramento ó profesorado da área de influencia das súas entidades membro e ós propios técnicos das entidades Down en metodoloxías de aprendizaxe cooperativa. Pola súa banda, algunhas das entidades membro de Down Galicia tamén participarán neste congreso a través de distintas mesas de comunicación e mesas redondas tratando temas como a inclusión educativa, a calidade de vida das persoas coa síndrome de Down, o emprego e os retos familiares ou o cambio na percepción social desta discapacidade. Ademais das comunicacións de Down Galicia e as súas entidades membro, durante estas tres xornadas poderase asistir a relatorios tan interesantes como o do fundador da Down Syndrome Clinic e director do Down Syndrome Center, George T. Capone, a conferencia de Marc J. Tassé, director do Centro Nisonger e profesor do Departamento de psicoloxía e psiquiatría da Universidade de Ohio ou a do Doutor Honoris causa pola Universidade de Salamanca e Profesor Emérito da Universidade de Nebraska, Robert L. Schalock. Este congreso, de carácter internacional, congregará a persoas coa síndrome de Down, profesionais, xerentes, responsables de programas de entidades e institucións de apoio ás persoas con esta discapacidade e ás súas familias en Iberoamérica, familiares de persoas con síndrome de Down e estudantes e persoas interesadas na investigación, innovación e mellora da atención ó colectivo. Aberto prazo de inscricións aquí.
Entradas relacionadas
