Down Lugo e a Asociación Provincial de Empresarios de Confeitería, Pastelería, Bollería e Repostería da provincia lucense poñerán á venda 2600 Chocolatinas Solidarias o vindeiro luns 21 de marzo, Día Mundial da síndrome de Down. O stand estará situado na Praza Maior de Lugo e todo aquel que o desexe poderá adquirir a súa chocolatina por tan só 1€. Esta iniciativa ten por obxectivo recadar fondos para Down Lugo e as súas familias usuarias, xa que a Asociación Provincial de Empresarios de Confeitería, Pastelería, Bollería e Repostería de Lugo doará integramente á entidade a cantidade recadada tras a venda das mesmas. Onte presentaban a iniciativa María José Blanco Freire, presidenta de Down Lugo, e Honorio Gómez, o seu homólogo no colectivo de pasteleiros da provincia. Blanco Freire foi a encargada de comentar a que se destinarán os cartos desta venda solidaria, da que “se beneficiarán 60 familias, pois a recadación será empregada para mellorar o noso Servizo de Promoción da Autonomía Persoal”. A través desta iniciativa “buscamos a solidariedade de todos os que desexen axudar a Down Lugo a continuar ca súa labor social, para asegurar a continuidade do seu proxecto e contribuír ao futuro das persoas que representa. Desde aquí, animámosvos a todos e a todas a colaborar con esta campaña”, apuntou tamén a presidenta. Desde Down Lugo fan fincapé na necesidade de que toda a sociedade se implique na loita contra a invisibilidade á que sempre se quixo someter ás persoas con discapacidade, e contra os estereotipos e os prexuízos dos que son obxecto. A súa presidenta aproveitou a presentación desta mañá para agradecer a todas as persoas que fixeron posible este proxecto “desde Honorio Gómez e as pastelerías que colaboraron na elaboración, ata as familias, voluntarios e traballadores de Down Lugo polo apoio nas tarefas loxísticas”. Honorio Gómez, pola súa banda,  destacou a importancia deste tipo de accións solidarias e explicou “desde o primeiro momento estivemos todos encantados de poder colaborar”. Engadiu tamén o presidente dos pasteleiro que “con esta pequena achega pódese facer moito”. Co fin de que as persoas con síndrome de Down desenvolvan todas as súas capacidades e a súa autonomía, Down Lugo encárgase de prestar apoio en atención temperá, logopedia, reforzo escolar, formación e procura activa de emprego, inserción laboral na empresa ordinaria, e en programas de vida independente e emancipación do fogar familiar. A totalidade das Chocolatinas Solidarias foron elaboradas por Pastelería Yomar, Confitería Mimos, Confitería Santos, Pastelería Martín, Confitería Mallorca, Pastelería Don León, Confitería Ramón y Confitería Madarro.   Evento: Chocolatina Solidaria Down Lugo Lugar: Soportais Praza Maior (esquina coa Rúa da Raíña) Data: Luns, 21 de marzo de 2016 (Día Mundial da síndrome de Down) Horario: A partir das 11:00 horas