Down Vigo participa no Campus Oportunidades para a Inclusión 2021 de Down España
A Fundación Down Compostela e a Fundación Vodafone España presentaron onte no Parador Hostal dos Reis Católicos de Santiago “H@ppy Day”, unha iniciativa cuxo obxectivo é concienciar a empresarios e á sociedade sobre os beneficios da inserción laboral das persoas coa síndrome de Down. Na presentación tomaron parte representantes do tecido empresarial de Santiago de Compostela, así como usuarios de Down Compostela que conseguiron un posto de traballo a través do programa de formación prelaboral “Yo me prep@ro”. Xuntos contaron as súas experiencias, poñendo de manifesto os beneficios que achegan as persoas con discapacidade intelectual no traballo e o positivo que é para os empresarios contar con empregados coa síndrome de Down nos seus persoais. Eles, empregados e empregadores, alentaron a outros empresarios para contratar a persoas con discapacidade intelectual e a que comproben as vantaxes sociais e produtivas que se obteñen ao darlles unha oportunidade nunha empresa normalizada: melloran o clima laboral, achegan alegría e optimismo, e son metódicos e organizados nas súas tarefas. No acto interviñeron: D. Francisco Conde López, Conselleiro de Economía, Emprego e Industria; Dna. Concepción Fernández Fernández, Concelleira de Políticas Sociais, Diversidade e Saúde do Concello de Santiago de Compostela; D. Jesús Asorey Carril, Presidente de Cámara Oficial de Industria, Comercio e Navegación de Santiago de Compostela; D. Juan Manuel Navarro, Director de Administración Pública en Galicia de Vodafone España; D. Juan Jesús Martínez López, presidente da Fundación Down Compostela, Dna. Nuria Pereira Martínez, Directora do Instituto Europeo Campus Stellae; Dna. Milagres Budiño Gasamáns, Directora do Centro de Atención Diúrna da Asociación Arela en Santiago de Compostela; Dna. Paula Fernández Suárez e Dna. Pamela D. Casagrande Pons, traballadoras do programa de Emprego con Apoio da Fundación Down Compostela. O programa “Yo me prep@ro” O obxectivo do proxecto “Yo me prep@ro” é proporcionar ás persoas con discapacidade intelectual as ferramentas e estratexias necesarias para facilitarlles o acceso ao emprego, a través das diferentes tecnoloxías implantadas na sociedade: acceso a Internet, uso do computador, acceso a redes bancarias informatizadas, comunicación a través da telefonía móbil ou fixa, realizar consultas en organismos públicos, programación e uso da televisión e DVD, etc. Grazas ao programa “Yo me prep@ro” están a recibir formación prelaboral en Novas Tecnoloxías 16 usuarios de Down Compostela. A nivel nacional o proxecto completou a súa I edición (2014-2015) con gran éxito pois superou as expectativas tanto no número de prácticas laborais conseguidas como na cifra de contratacións laborais, alcanzando os 72 contratos de traballo. Na segunda edición do curso, que concluirá este mes de abril, reciben esta formación en Novas Tecnoloxías un total de 240 usuarios de toda España a través de 15 cursos, cun total de 10.500 horas lectivas. O programa de formación desenvolverase en dous niveis: un de iniciación e outro de profesionalización, ambos dun ano de duración. O nivel de profesionalización comprende tamén prácticas en contornas laborais cuxo obxectivo é conseguir a inserción laboral.
Entradas relacionadas
