O Servizo de Orientación Laboral de Down Galicia supera o millar de accións para máis de 230 persoas usuarias de entidades Down
O Palacete de Mendoza de Pontevedra, sede de Turismo Rías Baixas, acolle ata o próximo 22 de abril a exposición As persoas con discapacidade na vida cotiá. A mostra, organizada pola Fundación Grupo Norte e o Instituto Universitario para la Integración en la Comunidad da Universidade de Salamanca coa colaboración de Down Galicia, componse de 65 fotografías que permiten coñecer e entender a realidade das persoas con discapacidade desde a perspectiva dos seus propios protagonistas, familiares, persoal de apoio e, por suposto, o fotógrafo que realiza a instantánea. O obxectivo é ofrecer imaxes positivas que permitan a reflexión, empatía e identificación co mundo da discapacidade. As instantáneas forman parte dunha selección específica realizada para a ocasión entre os mellores traballos presentados ao Concurso Internacional de Fotografía Dixital organizado desde o ano 2003 e que recibe anualmente máis dun milleiro de fotografías procedentes de todo o mundo. A exposición propón un enfoque ás realidades humanas promovendo a verdadeira integración das persoas con discapacidade desde os ámbitos da superación e normalidade. “Somos testemuñas así do proceso, certamente aínda lento pero inexorable, co que se abandona o histórico modelo asistencial de atención ás mal chamadas persoas con minusvalía, onde a discapacidade era considerada unha enfermidade invalidante, a un mundo no que cada persoa participa no curso do seu propio destino na defensa dos seus intereses, dereitos e necesidades”, explica Calixto Barba, da Fundación Grupo Norte. A accesibilidade, o deseño universal, a discriminación positiva en termos de integración laboral, son ideas forza que foron gañando peso, desbancando paradigmas afortunadamente esquecidos. Sobre a organización A Fundación Grupo Norte mantén un labor constante e a longo prazo no seu compromiso coas persoas con discapacidade, coa crenza de que na integración laboral e cultural radica o verdadeiro instrumento para cambiar a mentalidade social. A Fundación nace do compromiso empresarial de Grupo Norte, onde hoxe xa son máis de 400 as persoas con discapacidade que forman parte do persoal nas súas diferentes empresas. O INICO da Universidade de Salamanca é o único instituto oficial dunha universidade española dedicado a promover a investigación, formación especializada e asesoramento para contribuír á mellora de calidade de vida das persoas con discapacidade e das súas familias. Desde a súa fundación en 1997, o INICO realiza todas as súas actividades en colaboración coas administracións e con entidades privadas relevantes que se dedican ao logro de fins semellantes.
Entradas relacionadas
