“As persoas con discapacidade intelectual teñen as mesmas necesidades de orientación académica e profesional que o resto”
Down Vigo, Serunión e a Federación olívica de pais e nais de alumnos (Foanpas) presentaron o pasado luns un convenio de colaboración a tres bandas que permitirá a varios mozos e mozas da Asociación realizar prácticas en comedores escolares da cidade. Mediante este acordo, a empresa de restauración colectiva financia horas formativas de auxiliar de monitor a usuarios e usuarias de Down Vigo e, unha vez finalizada esta formación, ofrécelles a posibilidade de realizar prácticas nos comedores escolares, pertencentes á rede de colexios de Foanpas, que Serunión xestiona na cidade. Son 12 as persoas da asociación Down Vigo que xa realizaron as 20 horas de formación e que, nunha segunda fase, realizarán estas prácticas formativas. Neste sentido, Carlos Varela, Director de Serunión Galicia, apuntou que a empresa “ofrece o que será, para moitos mozos e mozas, a primeira toma de contacto co mundo laboral, favorecendo, ademais, a plena inclusión socio laboral e a vida autónoma das persoas con discapacidade intelectual”. E desde Foanpas sinalan que o acordo supón “un paso máis” na inserción laboral e sinalan que os colexios son “o primeiro paso” cara á inclusión social: “Todos temos os mesmos dereitos e hai que fomentar isto desde a escola”. Pola súa banda, en declaracións a Cadena Cope, a directora de Down Vigo espera que “de aquí salga unha posible inserción laboral”. Á firma do convenio asistiron o director e a xefa de servizo de Serunión, Carlos Varela e Clara Monroy, así como a directora de Down Vigo e a técnico de emprego, Ana Tejada e Isabel Sierra. Por parte de Foanpas acudiron a súa presidenta, Belén Fernández, e a portavoz, Bertila Fernández, así como Belén Fernández e Pilar Ramos. Este acordo con Down Vigo é extensivo a outras asociacións de Pontevedra e A Coruña, nos que tamén se ofrecerá formación e prácticas na rede de comedores escolares que xestiona Serunión.
Entradas relacionadas
