Un total de 40 persoas de todas as entidades Down en Galicia presentaranse este sábado, 11 de xuño, ao exame das oposicións convocadas pola Administración central do Estado para persoas con discapacidade intelectual. Esta proba, que se celebrará na Facultade de Ciencias da Información da Universidade Complutense de Madrid, corresponde á primeira fase do proceso selectivo para o ingreso como persoal laboral fixo coa categoría de Axudante de Xestión e Servizos Comúns (ordenanza). A convocatoria, realizada polo Ministerio de Facenda e Administracións Públicas, está destinada a cubrir un total de 70 prazas no conxunto do Estado español, das cales 6 corresponden ao ámbito autonómico galego -2 prazas na provincia de Pontevedra, outras 2 en Ourense, 1 en A Coruña e outra en Lugo-. Aposta polo Emprego Público O acceso ó emprego público para as persoas con discapacidade intelectual en xeral, e coa síndrome de Down, en particular, é unha das reivindicacións históricas da Federación Down Galicia. A Administración central convocara por primeira vez unhas oposicións en quenda única e independente para persoas con discapacidade intelectual no ano 2012, no que ofertaba 3 prazas de ordenanza para a Comunidade Autónoma de Galicia, 2 na Coruña e 1 en Lugo. Naquela ocasión, un mozo lucense coa síndrome de Down acadara o posto de Lugo, converténdose no primeiro galego con esta síndrome que conseguía unha praza nunha oposición convocada polo Estado. O feito de que ata entón as convocatorias se fixeran conxuntamente para o colectivo de persoas con algunha discapacidade – xa fose intelectual, física ou sensorial-, implicaba que non se tiña en conta que as dificultades dos diferentes grupos de persoas con discapacidade non son as mesmas. Considerando que cada tipo de discapacidade ten unhas particularidades propias, Down Galicia sempre reclamou que as adaptacións nas probas de acceso fosen específicas para cada grupo, xa que non é posible unha equiparación real de oportunidades de non terse en conta as diferenzas de partida. Ademais desta convocatoria estatal, en marzo de 2015, a Xunta de Galicia contemplou por primeira vez na súa historia na oferta de emprego público a reserva de prazas para persoas con discapacidade intelectual e a convocatoria dunhas oposicións dirixidas a este colectivo, neste caso para cubrir 6 prazas de ordenanza. FOTO: CRTVG