O presidente da Fundación San Rosendo, José Luis Gavela Varela, e a presidenta da Asociación Down Ourense, Mara Prieto Fortes, asinaron esta mañá un convenio de colaboración co fin de promover a integración sociolaboral das persoas coa síndrome de Down e con discapacidade intelectual. Este acordo amplíase ao Grupo Caldaria, pertencente á Fundación San Rosendo e a residencias da Fundación noutras provincias galegas (Lugo). Con este convenio facilítase a inserción laboral en contornas ordinarias das persoas que participan no Programa de Emprego con Apoio da Asociación Down Ourense. A través deste programa, as persoas coa síndrome de Down e con discapacidade intelectual asisten a unha formación en habilidades sociolaborais para, posteriormente, poder desempeñar un posto de traballo adaptado ao seu perfil, acompañadas nos seus primeiros momentos da figura do preparador laboral, quen estará a cargo da formación na empresa prestando un apoio in situ no posto de traballo. Coa firma deste convenio, estas entidades avalan o gran labor de Down Ourense e colaboran para que siga traballando a prol da inclusión laboral dos seus usuarios e usuarias. Jose Luis Gavela, presidente da Fundación San Rosendo recorda que “a experiencia de colaboración con Down Ourense foi moi positiva e enriquecedora para a Fundación” e celebra esta nova oportunidade de colaboración coa asociación ourensana. A asociación obtén deste xeito un novo apoio para o programa “Emprego con apoio” tralo convenio asinado hai pouco máis de dous meses coa Asociación de Jóvenes Empresarios de Ourense. A través deste tipo de acordos conséguese que as entidades corporativas se vaian abrindo cada vez máis ao mundo da discapacidade e poténciase a inclusión das persoas con diversidade funcional na sociedade. A Fundación San Rosendo, especialistas no servizo asistencial a maiores e persoas con discapacidade A Fundación San Rosendo leva máis de 20 anos prestando un servizo asistencial a colectivos desfavorecidos de Galicia. Conta con 70 centros repartidos por toda Galicia dos que 59 son residencias para atender a persoas maiores e 11 centros para atender exclusivamente a persoas con discapacidades físicas ou psíquicas. Na actualidade, conta con máis de 1.600 profesionais entre médicos, enfermeiros, psicólogos e educadores. O programa de emprego de Down Ourense O programa de emprego de Down Ourense pechou 20 contratos ó longo de 2015, asinados entre as 35 empresas visitadas durante o devandito exercicio. Deles, 12 son contratos temporais, 1 indefinido e 7 de prácticas laborais. A asociación destaca o crecemento e a aposta de “Emprego con apoio” por parte das empresas da provincia nos últimos anos. Durante o primeiro trimestre de 2016 pechouse un novo convenio de colaboración coa empresa ourensá de telefonía móbil Primux, cun contrato temporal dun ano de duración. Ademais, asináronse tres renovacións de contratos existentes, un indefinido coa empresa Rodríguez López Auto e dúas prórrogas na enerxética Repsol.