Tomando como punto de partida unha petición de Down Galicia, a Real Academia Galega decidiu, tras unha reunión do seu Seminario de Lexicografía, suprimir ou modificar varias palabras ou acepcións pexorativas referidas á síndrome de Down. Trala análise en profundidade destes termos, Down Galicia decidiu que a primeira reclamación se centrase na definición de “síndrome de Down”, xa que esta asociaba a alteración cromosómica con acepcións como debilidade mental ou deficiencias físicas. A nova proposta tería a seguinte forma: “Alteración xenética producida pola triplicación total ou parcial do cromosoma 21, que se caracteriza por un certo grao de discapacidade intelectual e un conxunto variable de trazos físicos”. Ademais, a Federación propuxo a eliminación completa do termo “mongolismo” e a modificación da observación da palabra “mongólico”, que quedaría redactada da seguinte maneira: “Non debe utilizarse esta palabra para referirse ás persoas coa síndrome de Down”. Tras estes cambios, que xa se atopan reflectidos na versión online do Dicionario, Down Galicia púxose de novo en contacto coa Real Academia Galega para solicitar a modificación ou eliminación da palabra “mongoloide”. A institución aprobou retirar a acepción vinculada á síndrome de Down que figura actualmente e que, en pouco tempo, será eliminada. “Debemos eliminar do noso vocabulario todo tipo de termos pexorativos” A Federación Down Galicia leva desde o ano 1.998 loitando pola inclusión, a igualdade e a non discriminación. O seu presidente, Delmiro Prieto, considera que “a terminoloxía que se emprega na linguaxe ten moita importancia polas connotacións que leva asociadas” e cre que “é vital que entidades de relevancia coma a Real Academia Galega avancen neste senso”. Así mesmo, insta á Real Academia Española a que esta iniciativa “sexa extensible a todo o territorio nacional”. Pola súa banda, a Real Academia Galega agradece a Down Galicia a súa colaboración para “lograr entre todos unha lingua máis digna, máis integradora e máis respectuosa para con todos os membros da nosa sociedade”. Petición á Real Academia Española na plataforma Change.org En marzo de 2015, coincidindo co mes de celebración do Día Mundial da síndrome de Down, unha petición na plataforma social Change.org instaba á Real Academia Española a que revisase palabras como “subnormal”, para pasar a consideralo un insulto; e para precisar palabras como “mongolismo” ou “mongólico”, que remiten ao termo “síndrome de Down” e están en desuso, ademais de modificar o significado deste último. A institución decidiu reformar a definición de “síndrome de Down”, xa visible na web, pero, en palabras do seu voceiro “probablemente” non se realizarán outras modificacións máis alá deste termo. “Este é un episodio máis de peticións” e “a RAE non é allea, pero non pode cambiar todo o que se lle pide”, subliñaron.