Durante este mes de agosto, Down Pontevedra “Xuntos” asinou un novo convenio de colaboración cunha empresa da cidade. Trátase dos centros de día SARAIVA, dedicados a ofrecer servizos de atención a persoas maiores e/ou dependentes.

Mediante este acordo, as persoas maiores coa síndrome de Down ou outra discapacidade intelectual usuarias da Asociación terán descontos nos servizos que alí se prestan.

Envellecemento nas persoas coa síndrome de Down

Un dos cambios máis significativos das persoas coa síndrome de Down nas últimas décadas é o notable incremento da súa esperanza de vida, que pasou de ser de aproximadamente 9 anos a comezos do pasado século aos 60-64 anos da actualidade. Isto foi posible grazas aos avances nos ámbitos da saúde integral, á incorporación a unha educación inclusiva, á presenza cada vez máis normalizada e demandada por elas mesmas para acceder aos contextos laborais, e aos novos modelos de vida independente que se están levando a cabo desde fai anos na sociedade actual.

Xunto co incremento da esperanza de vida, tamén se teñen observado a aparición de manifestacións propias dun envellecemento precoz –comezan envellecer a partires dos 40 anos aproximadamente- así como unha asociación importante entre a síndrome de Down e a enfermidade de Alzheimer.

Por iso é necesario que os recursos dirixidos ás persoas maiores teñan en conta esta realidade. Down Galicia e as súas entidades membro intentan dar resposta ás necesidades do colectivo nesta etapa e traballan para que poidan dispoñer dos recursos comunitarios ós que teñen dereito como cidadáns.