Seis mozos e mozas de Compostela e seis de Vigo, coa síndrome de Down e outras discapacidades intelectuais, reciben esta semana unhas xornadas de formación intensiva na profesión barista, para poder exhibir os seus coñecementos no V Campionato Barista de Galicia, que se celebrará o domingo 2 de outubro na terraza do restaurante Porta Faxeira (rúa do Franco, 50) de Santiago, a partir das 17.00 horas (en caso de choiva celebrarase no Hotel Virxe da Cerca).
Desde o pasado luns, os profesionais baristas da escola de Cafento Diego López e Luís Pérez, en Santiago, e Víctor Couto e Marcos González, en Vigo, están a formar ós integrantes dos dous equipos que o domingo demostrarán as súas cualidades como baristas. Os gañadores do campionato poderán realizar prácticas laborais en establecementos de hostalería, para facilitar o seu acceso ao mercado laboral.
Os Campionatos Baristas Down son unha iniciativa pioneira no mundo, nacida en Galicia en 2012 coorganizados por Cafento e a Fundación Down Compostela, que buscan visibilizar ao colectivo de persoas coa síndrome de Down en termos positivos; dar unha formación profesional especializada a persoas deste colectivo; facilitar a súa inserción no mercado do traballo con prácticas laborais en establecementos de hostalería. Actualmente celébranse tamén nas comunidades autónomas de Andalucía, Asturias, Madrid, Murcia e Valencia.
Tiveron eco na prensa internacional e inspiraron un proxecto similar na cidade canadense de Toronto, chamado Made by Mavericks, que en 2015 recibiu un importante premio naquel país. Gerald Fantone, técnico de emprego na cooperativa sen ánimo de lucro Common Ground Co-Operative e creador dese proxecto, visitou Galicia o pasado ano para asistir ao IV campionato, a fin de coñecer mellor o seu funcionamento.
O V Campionato Barista de Galicia é coorganizado por Cafento, a Fundación Down Compostela, a Asociación Down Vigo e Pousadas de Compostela.
O V Campionato Barista Down de Galicia
Os participantes terán de preparar, ante xuíces baristas de recoñecido prestixio, dous cafés expresos, dous capuchinos decorados coa técnica do latte art e dous cócteles a base de café.
Todos os participantes accederán a prácticas laborais nos establecementos hostaleiros colaboradores da súa localidade.
Dúas notas sobre a historia dos Campionatos Baristas Down
Os Campionatos Baristas Down son unha iniciativa da empresa cafetera Cafento (en Galicia máis coñecida polas súas marcas Cafegal, O Galego e O Trópico), pioneira no mundo e que consiste en levar as competicións entre profesionais expertos na cultura do café de calidade ás persoas coa síndrome de Down.
O primeiro Campionato Barista Down desenvolveuse en Galicia no ano 2012, sendo coorganizado pola Fundación Down Compostela. En 2013 celebrouse a súa segunda edición contando nesta ocasión, ademais, co concurso da Asociación Down Vigo. En 2014, ao decano certame galego sumáronse os Campionatos Baristas de Andalucía, Asturias e a Rexión de Murcia. En 2015 Cafento xa promoveu a celebración dos Campionatos Baristas Down de: Comunidade Valenciana (febreiro), Andalucía (maio) e Asturias (xuño); e este ano en Madrid e a Rexión de Murcia.
Balance dos Campionatos Baristas Down ata agora
Grazas a estes certames, cento vinte persoas coa síndrome de Down e outras discapacidades intelectuais de toda España, puideron formarse como especialistas no mundo do café. Deles, case unha trintena tivo ocasión de realizar prácticas laborais en diversos tipos de establecementos de hostalería.
Varios dos participantes nos diversos campionatos foron contratados de modo temporal pola propia Cafento que, ademais, contratou de maneira indefinida a dúas dos participantes na primeira edición do Campionato Barista Down de Andalucía (2014), para a súa sede en Córdoba.
Pero, máis aló de pretender contribuír á inserción laboral, e consecuente autonomía das persoas coa síndrome de Down e outras discapacidades intelectuais, os Campionatos Down queren ser unha oportunidade para visibilizar a este colectivo como persoas diferentes, pero perfectamente capaces.
