Delmiro Prieto, presidente da Federación Down Galicia, e Jesús Vázquez Almuiña, conselleiro de Sanidade en funcións, asinaron esta mañá un convenio de colaboración para a inserción laboral de persoas coa síndrome de Down e/ou discapacidade intelectual. O acordo fixa as condicións para comezar a desenvolver actividades que promovan e fortalezan as opcións de empregabilidade das persoas usuarias das sete entidades que conforman Down Galicia no Servizo Galego de Saúde.
“A administración é a casa de todos e, como tal, debe cubrir as necesidades de todos os seus membros”. Así valorou Delmiro Prieto o peche deste convenio, resaltando o apoio que debe establecer a consellería para a igualdade de todas as persoas que compoñen a sociedade. “As persoas coa síndrome de Down e/ou discapacidade intelectual son persoas de pleno dereito”, apostilou o presidente da organización.
Pola súa banda, o conselleiro Jesús Vázquez Almuiña agradeceu a Down Galicia e as súas entidades membro o traballo que veñen desenvolvendo desde hai máis de 25 anos. “Queremos contribuír con apoios e oportunidades a que cada persoa con discapacidade intelectual e a súa familia poidan desenvolver o seu proxecto de calidade de vida, así como a promover a súa inclusión como cidadán”, explicou o conselleiro durante a sinatura.
O convenio é o punto de partida para o proceso de inserción e adaptación efectiva ao posto de traballo de persoas coa síndrome de Down e/ou discapacidade intelectual no SERGAS. Para iso, impartiranse cursos de formación específicos previos ao comezo da prestación de servizos na Administración; seguimento do desempeño da actividade laboral, incluíndo formación continua en competencias instrumentais, transversais e laborais para este colectivo e de acordo cos resultados da detección de necesidades formativas; e realizaranse obradoiros prácticos de intercambios de experiencias dirixidos ao persoal que realiza funcións de referencia na súa contorna de traballo.
Primeiras oposicións dirixidas a persoas con discapacidade intelectual
En marzo de 2015 a Xunta de Galicia contemplou por primeira vez na súa historia na oferta de emprego público a reserva de prazas para persoas con discapacidade intelectual e a convocatoria dunhas oposicións dirixidas a este colectivo, neste caso para cubrir 6 prazas de ordenanza.
Estas 6 prazas únense ás 33 que se inclúen na Oferta de Emprego Público para este 2016 reservadas para este colectivo, nas que se inclúen 17 do SERGAS. Esta convocatoria contemplará a súa propia lista de contratación temporal.
Demandas sobre atención temperá e envellecemento
A Federación Down Galicia entregou ao conselleiro unha serie de demandas existentes na actualidade no ámbito da Atención temperá e Envellecemento de persoas coa síndrome Down e/ou discapacidade intelectual.
A organización ve necesaria unha rede pública de atención temperá gratuíta e regulada para nenos de entre 0 e 6 anos. Recentemente detectouse a derivación destes servizos a entidades privadas, cando isto corresponde á administración e as entidades Down non teñen financiamento específico nin estable para levalos a cabo. A federación considera, en cambio, que a súa traxectoria e persoal cualificado deberíanlle permitir formar parte da Rede Galega de Atención Temperá.
Doutra banda, as persoas coa síndrome de Down viviron un espectacular aumento da súa esperanza de vida, superando os 60 anos. Demándase identificar e protocolizar esta realidade, coñecendo as necesidades de atención e diagnóstico do Alzhéimer e outras demencias. Para iso, Down Galicia ve necesario lograr un marco de colaboración co SERGAS.
