A Federación Down Galicia organiza o vindeiro sábado 5 de novembro “Experiencias e Metodoloxías de Educación Inclusiva”, unha xornada de aprendizaxe para profesionais docentes, de orientación e equipos directivos dos centros educativos de infantil, primaria e secundaria da Comunidade Autónoma de Galicia.

O obxectivo desta formación, homologada pola Xunta de Galicia, é contribuír á mellora da sensibilización e formación dos participantes na utilización de metodoloxías inclusivas e boas prácticas como medida de atención e optimización do proceso de inclusión educativa do alumnado con maiores necesidades de apoio educativo.

A xornada estará centrada, na súa maior parte, na presentación de testemuños e experiencias de profesionais da educación, entre os que destaca Cecilia Simón Rueda, Doutora en Psicoloxía e Mestra Titular do Departamento Interfacultativo de Psicoloxía Evolutiva e da Educación da Universidade Autónoma de Madrid (UAM) e membro do grupo de investigación “Inclusión/exclusión educativa: procesos interpersonales” da UAM e do equipo que coordina o “Consorcio para a educación inclusiva”.

A finalidade das metodoloxías inclusivas e as boas prácticas é acadar unha escola con capacidade para  responder ás necesidades individuais dos seus alumnos e alumnas, sexa cal sexa o seu grao de especificidade. Un tipo de escola que debe ser capaz, polo tanto, de adecuar recursos e metodoloxías ás características de todo o alumnado.

Consulta toda a información e o programa da xornada aquí.

Inscríbete a través dos seguintes enlaces segundo a opción que che corresponda:

a. Es persoal en activo o 5/11/2016 nun centro educativo sostido con fondos públicos?: Inscríbete aquí

b. Outro participante (outro persoal)?: Inscríbete aquí