Down Galicia contrata 9 profesionais para postos técnicos da Federación ao abeiro dos Programas de Cooperación 2021-2022
Down Galicia celebrou o pasado sábado a xornada “Experiencias e Metodoloxías de Educación Inclusiva” na que participaron profesionais docentes, de orientación e directivos dos centros educativos de infantil, primaria e secundaria da Consellería de Educación, así como técnicos de educación das entidades Down. Trátase dunha acción formativa homologada pola propia Consellería de Educación e que contou con 120 persoas inscritas.
Esta formación tivo como obxectivo principal a contribución á mellora da sensibilización e formación dos participantes na utilización de metodoloxías inclusivas e boas prácticas como medida de atención e optimización do proceso de inclusión educativa do alumnado con maiores necesidades de apoio educativo.
A parte máis teórica correu a cargo de Cecilia Simón Rueda, Doutora en Psicoloxía e Profesora Titular do Departamento Interfacultativo de Psicoloxía Evolutiva e da Educación da Universidade Autónoma de Madrid (UAM). Simón, que tamén é membro do grupo de investigación “Inclusión/exclusión educativa: procesos interpersonales” da UAM e do equipo que coordina o “Consorcio para a educación inclusiva”, falou sobre a importancia da educación inclusiva e da inclusión no seu conxunto e resaltou a relevancia de non crear un modelo único de aprendizaxe, senón metodoloxías centradas en cada individuo.
Na primeira mesa redonda, xa nunha liña máis práctica, analizouse o traballo realizado nos colexios de Castroverde, Valdoviño, Ponteareas e Cambados, relatando algunhas das metodoloxías e ferramentas empregadas nestes centros. Así, Carmen Morán centrou a súa intervención nas “Comunidades de Aprendizaxe”, Laura Fernández no “Traballo por proxectos”, Margarita Loureiro na “Intelixencia emocional e as TICs” e Rosa Fiel na metodoloxía da “Aprendizaxe Cooperativa”.
Xa pola tarde, os relatorios estiveron centrados en experiencias e boas prácticas en centros educativos. En primeiro lugar, os asistentes puideron escoitar da man do especialista en pedagoxía terapéutica Amador Bernardo, a historia de Tamara Carballa, unha rapaza de Vigo coa síndrome de Down que acadou o Premio extraordinario da ESO ó esforzo e á superación persoal outorgado pola Xunta de Galicia.
A continuación, tivo lugar a exposición de Mercedes Alfaro e Samuel Otero, mestres do IES Pino Manso de O Porriño, que compartiron cos participantes na xornada a experiencia “Entre tod@s é posible” sobre a inclusión dun alumno coa síndrome de Down nunha FP Básica. Seguidamente, Laura Fernández, mestra do CPI de Atios (Valdoviño), relatou a súa experiencia traballando con intelixencias múltiples.
A mesa escollida para finalizar a xornada foi “Outras voces da inclusión”. A primeira intervención veu da man de Ramón Costas, responsable da área de educación de Down Pontevedra “Xuntos”, que presentou o testemuño de Pedro, un alumno coa síndrome de Down escolarizado nun centro ordinario, e a súa nai Marisé. E para rematar, Xosefina Pereira, mestra de educación primaria, compartiu a súa experiencia sobre inclusión cunha alumna coa síndrome de Down.
Finalidade das metodoloxías inclusivas
A finalidade das metodoloxías inclusivas e as boas prácticas é acadar unha escola con capacidade para responder ás necesidades individuais dos seus alumnos e alumnas, sexa cal sexa o seu grao de especificidade. Un tipo de escola que debe ser capaz, polo tanto, de adecuar recursos e metodoloxías ás características de todo o alumnado.
Entradas relacionadas
