A Fundación Lealtad, institución independente e sen ánimo de lucro, outorgou a Down Ourense o selo ONG Acreditada. Trátase dun distintivo único en España que axuda ós doantes para recoñecer de forma clara e sinxela a aquelas ONG que cumpren as actuais esixencias de transparencia e eficacia na xestión. Grazas ó selo, os doantes saberán que Down Ourense centra os seus esforzos nas áreas nas que ten experiencia, que a súa comunicación é fiable e non induce a erro ou que poden coñecer a porcentaxe de gastos que destina á súa misión, entre outros indicadores.
A concesión da acreditación é resultado dunha pormenorizada análise que concluíu que Down Ourense cumpre integramente os 9 Principios de Transparencia e Boas Prácticas. “A Fundación contrastou, entre outros puntos, o bo funcionamento do órgano de goberno da ONG para o cumprimento das súas responsabilidades e o uso eficaz dos seus recursos, se a entidade é sustentable e se a súa comunicación é fiable, así como a coherencia das súas actividades coa súa misión de interese xeral”, indicou Patricia de Roda, directora xeral da Fundación Lealtad.
Para Susana Rodríguez Moreiras, xerente de Down Ourense, esta acreditación “simboliza un recoñecemento por un terceiro do traballo desenvolvido nestes 13 anos, nos que sempre se ofreceu un servizo ás persoas para as que traballamos seguindo parámetros de calidade, con obxectivos da organización, por áreas e individualizados para cada persoa usuaria”.
O selo ONG Acreditada ten unha vixencia de dous anos e Down Ourense está autorizada a utilizalo nos seus materiais de comunicación e captación de fondos. “A sociedade española evolucionou e é agora máis esixente con respecto a todas as institucións, incluídas as ONG. Co selo da Fundación Lealtad, os cidadáns e as empresas recoñecerán a Down Ourense como unha ONG á que doar cun plus de confianza”, sinalou de Roda.
Cabe resaltar que Down Ourense é a única entidade de Ourense acreditada pola Fundación Lealtad. “Co selo informamos á nosa contorna que a entidade cumpre con criterios de boas prácticas e transparencia e con iso esperamos obter unha maior colaboración mediante doazóns de empresas e particulares”, comentou Rodríguez Moreiras.
O selo ONG Acreditada e o seu rigoroso proceso de concesión están avalados pola experiencia da Fundación Lealtad que desde o ano 2001 analizou a máis de 270 ONG e elaborado máis de 1.500 informes de transparencia e boas prácticas. A súa metodoloxía foi recoñecida nacional e internacionalmente. Á acreditación poden optar ONG de diferente perfil: asociacións e fundacións, grandes e pequenas, que desenvolvan proxectos de cooperación ao desenvolvemento e acción humanitaria, atención a colectivos desfavorecidos en España e medio ambiente. Os 9 Principios analizados agrupan máis de 40 indicadores de transparencia e boas prácticas. A información completa cos resultados da análise da Fundación pódese consultar en www.fundacionlealtad.org