Un estudo lanza importantes conclusións sobre as consecuencias psicosociais da pandemia entre os mozos e mozas coa síndrome de Down
O próximo 8 de febreiro, o movemento asociativo da discapacidade do noso país alzará a voz para denunciar unha grave situación discriminatoria: a revogación do dereito ao voto das persoas con discapacidade. Será ás 11h. fronte ao Tribunal Constitucional (c/ Domenico Scarlatti, 6. Madrid) e queremos que nos acompañe o maior número de cidadáns posible.
O pasado mes de decembro coñecemos a recente decisión do Tribunal Constitucional de ignorar o dereito ao voto das persoas con discapacidade intelectual. Ese fallo do Constitucional parte dun recurso que presentou a familia de Mara, unha moza galega de 20 anos con discapacidade intelectual á que se lle denegou o seu dereito ao sufraxio.
O seu caso non é moi distinto do das outras 100.000 persoas que no noso país están na súa mesma situación: o ano pasado os seus pais solicitaron unha incapacitación parcial, pero “respectándolle os seus dereitos personalísimos”, entre os que se atopa a posibilidade de votar. Lamentablemente, primeiro o xulgado de Santiago e máis tarde a Audiencia Provincial e o Tribunal Supremo ditaron sentenza revogándolle o seu dereito ao voto. A familia recorreu en última instancia ao Constitucional. Hai un mes este órgano decidiu rexeitar o recurso, reafirmando así a sentenza que priva a Mara de poder votar en eleccións.
Trátase dunha decisión que senta un precedente que afectará ás case 100.000 persoas con discapacidade intelectual que se atopan nesta mesma situación. Evitando pronunciarse, o Constitucional situouse en contra do dereito ao voto destas persoas.
Por ese motivo, a Federación uniu forzas co CERMI e con Plena Inclusión, e xuntas pretendemos concentrar ao movemento asociativo do país e reunir o próximo 8 de febreiro ás 11h. a unha ampla representación do colectivo da discapacidade fronte a Tribunal Constitucional. Desde aquí, queremos convidar a todo o mundo a participar neste acto, e a sumar a súa voz á da nai de Mara, Mar Caamaño, que encabezará a concentración para denunciar esta situación. Ademais, creamos un manifesto en Lectura Fácil que se lerá alí e que reclama o dereito ao voto. Podes velo aquí.
Lembra, o 8 de febreiro ás 11h. únete á concentración fronte ao Tribunal Constitucional (c/ Domenico Scarlatti, 6. Madrid) polo dereito para votar das persoas con discapacidade. Esperámoste! E convidámoste a usar o hashtag #MiVotoCuenta para difundir esta información e facer forza nas redes sociais.
Entradas relacionadas
