Down Pontevedra “Xuntos” está a preparar, coa axuda de outras entidades sociais da cidade, un mosaico feito con pequenas pezas de azulexo para conmemorar o Día Mundial da síndrome de Down. A parede escollida, cedida polo Concello de Pontevedra, está situada na Avenida das Corvaceiras, baixo a Ponte da Barca, e o debuxo representará unha ponte, símbolo da cidade e fará alusión a Down Pontevedra e ao Día Mundial.
Esta bonita iniciativa naceu trala proposta do artista de O Barco de Valdeorras, Gerardo Rodríguez “Chere”, para colaborar coa asociación pontevedresa. O barquense leva consigo unha gran bagaxe neste tipo de obras de arte urbanas, entre as que destaca o mosaico realizado no IES Bouza Brey de máis de 130 metros cadrados.
Manuel Pérez Cabo, presidente de Down Pontevedra “Xuntos” salienta “a colaboración de moitos veciños e veciñas da cidade para que este proxecto se faga realidade”. E é que na realización desta obra, que deu comezo o pasado luns 6 de marzo e que se estenderá ata o vindeiro 17 deste mes, están a participar outras asociacións sociais da cidade lo Lérez, ademais de colexios, institutos e asociacións de veciños.
No día de hoxe estiveron colaborando na creación deste mosaico persoas usuarias, profesionais e membros da Xunta Directiva de Xuntos, persoas usuarias da Organización ONCE en Pontevedra, membros da AA.VV. Castelao, xogadores do club de balonmán SD Teucro e mesmo a concelleira de Benestar Social, Carmen Fouces.
Esta acción queda englobada dentro da batería de actividades que Down Pontevedra “Xuntos” ten preparadas para a conmemoración do seu XXV aniversario e do Día Mundial da síndrome de Down, en colaboración coa Federación Down Galicia. Destaca o acto central na Praza da Pedreira, xunto ao Pazo de Mugartegui, onde terán lugar a actuación do grupo pontevedrés Vörtex, a lectura do Manifesto pola Autonomía persoal, a entrega do IV Premios Down Galicia e as intervencións dos presidentes de Xuntos e Down Galicia, do alcalde da cidade, Miguel Anxo Fernández Lores, da deputada de Cohesión Social e Xuventude, Digna Rosa Rivas; e, previsiblemente, do Vicepresidente da Xunta de Galicia, Alfonso Rueda.
Ademais, durante o propio 21 de marzo poderemos gozar dunha exposición fotográfica sobre o traballo que realiza diariamente Xuntos ou impoñernos ós estereotipos que existen sobre as persoas coa síndrome de Down no Labirinto “No camiño da inclusión”, que estará instalado na Praza da Ferrería.
Nacións Unidas aprobou en novembro de 2011 a declaración do 21 de marzo como Día Mundial da síndrome de Down. Establécese esta data, o 21 de marzo [21/03] como un símbolo, en referencia á triplicación [trisomía] do cromosoma 21 que se traduce na condición xenética da síndrome de Down.