O Presidente da Deputación de A Coruña visita a sede de Down Compostela para coñecer as principais demandas da Fundación
Mónica Otero reivindicou esta noite os dereitos das persoas coa Síndrome de Down e animou aos asistentes á gala de entrega dos Premios Down Compostela a “tomar conciencia de que sen a vosa axuda, a normalización da vida das persoas con discapacidade nunca será completa”. “Hoxe queremos premiar ás persoas e entidades que nos axudan cada ano para construír unha sociedade máis xusta”, asegurou esta moza de doce anos ao principio do acto.
Máis de 200 persoas acudiron á gala celebrada no Hostal dos Reis Católicos, co que Down Compostela conmemora o Día Mundial da Síndrome de Down. No acto, ao que asistiron o presidente do Parlamento galego, o alcalde de Santiago, o Director Xeral de Asistencia Sanitaria, a Directora Xeral de Maiores e Persoas con Discapacidade e a Secretaria Xeral de Emprego, entre outros, recoñeceuse o traballo e a implicación do Colexio Divino Maestro, a empresa Xade (que xestiona o Multiusos Fontes do Sar) e de Carmen Barbeito para favorecer a integración educativa, laboral e social das persoas coa Síndrome de Down.
Reproducindo o lema da campaña que puxo en marcha Down España este ano, o presidente de Down Compostela, Juan Martínez, pediu que se “cambie a mirada sobre a Síndrome de Down para conseguir unha sociedade inclusiva de verdade, na que ninguén se sinta marxinado”. No seu discurso destacou as primeiras oposicións que a Xunta convoca para persoas con discapacidade intelectual (que comezan o 8 de abril) e animou ao Concello de Santiago e a outras administracións a tomar exemplo e a facilitar o acceso ao emprego público ás persoas con discapacidade intelectual.
Juan Martínez mostrou a preocupación do colectivo porque o sistema educativo dea un paso atrás na inclusión de alumnos con necesidades educativas especiais, debido á LOMCE, e polo dereito ao voto das persoas con discapacidade intelectual. “Tamén nos preocupa que moitas persoas con discapacidade intelectual non poidan votar en España, porque os nosos políticos non fan ben o seu traballo e non se poñen de acordo para modificar unha lei electoral que incumpre a Convención da ONU sobre os Dereitos das Persoas con Discapacidade”, afirmou o presidente de Down Compostela
A Gala
No transcurso da gala, á que asistiron máis de 200 persoas, Mónica Otero e Eva Millán presentaron un vídeo no que se resume o proxecto de vida independente que ten en marcha Down Compostela.
Adrián Cutrín dixo sentirse un “mozo con sorte” porque hai máis de dous anos empezou a traballar no Multiusos Fontes do Sar co seu amigo Juan Carlos Castiñeiras. “Estamos moi contentos porque nos gusta o noso traballo e, ademais, en novembro fixéronnos un contrato indefinido”, dixo. “Xade deunos esta oportunidade e nós soubemos aproveitala. Por iso demostramos cada día o importantísimo que é para as persoas con discapacidade intelectual ter un emprego e poder ser independentes”, engadiu Adrián.
Juan Carlos Castiñeiras fixo entrega do Premio Down Compostela 2017 ao presidente do consello de administración de Xade, o alcalde de Santiago, Martiño Noriega.
David Aldrey deu as grazas aos seus compañeiros e aos profesores do Colexio Divino Maestro. “Son estudante de ESO no Divino Maestro. Os nosos profes buscan formas para que todos podamos aprender xuntos”. Marta López foi a encargada de entregarlle o Premio Down Compostela 2017 á directora do centro, María do Pilar Garea Rodríguez.
Daniel Martínez presentou o premio outorgado a Carmen Barbeito, “unha muller grazas á cal puidemos realizar proxectos tanto para os pequenos da nosa fundación como para os que xa nos estamos formando no ámbito laboral”. Daniel destacou a “dedicación e capacidade” da homenaxeada para “buscar apoios” entre os seus compañeiros do BBVA. “Fixeches posible que entre todos vaiamos camiñando cara a un mundo máis xusto para todos nós. Persoas como ti son moi importantes para o noso colectivo”, engadiu, antes de que Pepa Lockhart entregara o Premio Down Compostela 2017 a Carmen Barbeito Manteiga.
Tras a entrega de premios, o Grupo de Teatro Down Compostela presentou un avance da súa nova obra de teatro: “Arturo, Arthur, Artur”. A estrea da mesma será o próximo 17 de xuño no Salón Teatro. Baixo a dirección de Lucas Herrador, o Grupo de Teatro Down Compostela representou xa oito obras.
Pola súa banda, Cristina Villar, animou aos presentes para asistir o mércores, 22 de marzo, ao partido solidario que organiza a empresa Cenor, e no que xogadores do Obradoiro, Compostela e Santiago Futsal “disputarán un torneo no que veremos a xogadores de baloncesto xogar ao fútbol e viceversa. Será moi divertido”, asegurou. O torneo disputarase no polideportivo de Santa Isabel ás 20.00 horas e o prezo da entrada é de 5 euros. Todo o diñeiro recadado será entrega a Down Compostela para financiar os seus proxectos.
Entradas relacionadas
