Xuño será un mes marcado no calendario de Juanjo Castrillón. E é que no día de onte, este membro de Teima Down Ferrol, iniciou a súa andaina profesional no Colexio de Avogados da cidade ferrolá.

Esta organización, con máis de 65 anos de historia, amosa así a súa confianza no programa de Emprego con Apoio que as entidades Down en Galicia levan a cabo desde o ano 2002 e desenvolve unha importante labor social apostando pola inclusión sociolaboral dunha persoa coa síndrome de Down. Oportunidades coma esta contribúen de xeito moi positivo á mellora da calidade de vida das persoas con discapacidade intelectual, xa que constitúe unha forma moi eficaz de sentir que se forma parte da sociedade na que se vive.

Juanjo vén de asinar un contrato, a media xornada e dun ano de duración, polo que desempeñará tarefas de ordenanza nas instalacións que o Colexio de Avogados ten no Palacio de Xustiza de Ferrol. Alí, custodiará as togas que os letrados empregan nos xuízos, sendo o encargado do control de saídas e entradas das mesmas mediante comprobación do Documento Nacional de Identidade.

Este xa é o cuarto emprego de Juanjo, que anteriormente tamén traballou de ordenanza, de persoal de limpeza e de recepcionista.

Estas e outras oportunidades laborais foron posibles grazas ao programa de Emprego con Apoio que en Galicia levan a cabo todas as entidades Down desde hai case 15 anos. O programa, que mantén bos resultados de inserción a pesar da crise, está orientado a facilitar que as persoas con discapacidade intelectual atopen emprego en empresas ordinarias. Para que estas insercións sexan efectivas cóntase coa figura de un preparador o preparadora laboral (profesional que se encarga de ensinar á persoa con discapacidade no posto de traballo), e que non supón custe algún para a empresa. Este tipo de apoio no posto é gradual e vaise retirando ata desaparecer por completo a medida que a persoa con discapacidade vai adquirindo autonomía nas tarefas propias do seu posto.

A participación e cada vez maior presenza das persoas con discapacidade intelectual nas empresas ordinarias contribúe de forma eficaz a desterrar os tópicos que tradicionalmente se lles atribúen, resultando un modo sumamente eficaz de inclusión social. Contribúe, así mesmo, a propiciar un cambio de visión, de persoa con discapacidade a traballador ou traballadora, constatándose unha importante implicación dos compañeiros e compañeiras de traballo na aceptación da diversidade.