Down Lugo adapta as súas xornadas de ocio organizando quedadas online
O pasado martes 3 de outubro inaugurábase en Lugo a mostra fotográfica “Enfocando Historias”. A capela do Fogar de Santa María acollerá ata o 29 de outubro esta exposición gratuíta, que recolle 36 fotografías realizadas por 17 persoas usuarias de Down Lugo dirixidas pola fotógrafa Aleksandra Dmitrieva, voluntaria desde hai dous anos na Asociación e encargada de impartir o taller de fotografía. Nestas sesións participaron tamén doce voluntarios da Asociación Sénior de Telefónica de Lugo (ASTELU) e de Down da provincia de Lugo.
Os artistas crearon catro historias que posteriormente plasmaron en fotos. Así, cada narración cóntase nun máximo de 10 instantáneas, todas elas ambientadas na praia de Peñarronda. O traballo, que se enmarca nas actividades da Fundación Telefónica de Madrid, comezou a finais do mes de maio.
Ao acto de inauguración asistiron a Deputada de Cultura, Pilar García Porto; a Concelleira de Benestar, Ana González Abelleira; o Delegado Territorial da Xunta, José Manuel Balseiro; e a Presidenta de Down Lugo, María José Blanco.
García Porto destacou na súa intervención que “con esta mostra, dende o Executivo Provincial queremos trasladar e incidir na nosa mensaxe de que todos as persoas temos capacidades diferentes. Algunhas delas extraordinarias, que son as que fan posible a elaboración de proxectos artísticos como o que hoxe nos enorgullece traer a esta sala exposicións”.
Ainara Garea, educadora e responsable de Lecer na Vida Adulta en Down Lugo, recalcou a importancia destas actividades, para mostrar “que os mozos teñen intereses comúns a todo o mundo, e con isto teñen a oportunidade de ter actividades adaptadas e que poden compartir con outros”. Ademais, afirmou que a fotografía “é un ámbito que lles interesa moito”.
O horario da mostra é de luns a venres de 10:30 a 14:00 horas e de 17:00 a 20:00 horas; sábados, domingos e festivos de 11:00 a 14:00 horas e de 16:30 a 20:00 horas.
Entradas relacionadas
