A Asociación Down Ourense vén de presentar o seu calendario solidario 2018, que se poderá adquirir a partir do día de hoxe en diversos puntos da cidade.
Nesta edición, a asociación contou coa colaboración do Complexo Hospitalario Universitario de Ourense e dos fotógrafos Mani Moretón e Emilio Romanos, que conseguiron captar coas súas cámaras divertidos momentos das persoas usuarias da entidade traballando man a man con profesionais do hospital ourensá.
O acto de presentación do almanaque tivo lugar no vestíbulo do novo edificio hospitalario, onde a presidenta da entidade, Mara Prieto Fortes, destacou a importancia desta iniciativa e resaltou que “o calendario solidario supón para Down Ourense unha fonte de ingresos moi importante e será unha vía máis de visibilidade e protagonismo para as persoas coa síndrome de Down e discapacidade intelectual”. Tamén quixo agradecer “a cálida e comprometida participación de todas as persoas que, de maneira desinteresada, o fixeron realidade”. Prieto aproveitou o final da súa intervención para destacar que “aínda que as fotografías están tomadas nun hospital, as persoas coa síndrome de Down e outras discapacidades intelectuais non son enfermos. Non padecen, nin sofren, nin están afectados pola síndrome de Down. Simplemente son persoas”.
Na rolda de prensa tamén participaron o xerente da EOXI (Estrutura de Xestión Integrada) de Ourense, Verín e Barco de Valdeorras, Dionisio López Bellido, e os fotógrafos Mani Moretón e Emilio Romanos.
Ademais da colaboración do CHOU, foron tamén moitas as empresas da cidade que brindaron o seu apoio a Down Ourense neste proxecto: Angelo Milano, Egatel, Envialia, Imgrafor, Ourenmatel e Redegal.
Este ano a tirada será de 1.400 exemplares: 700 calendarios de parede e 700 calendarios de mesa, que se venderán a 5 € cada un. Os beneficios obtidos coa súa venda irán destinados integramente ós programas de promoción da autonomía que se levan a cabo en Down Ourense.
Aquelas persoas que así o desexen, poderán adquirir o seu calendario solidario na propia asociación e nas tendas Angelo Milano (Rúa do Paseo, 30) e Nuria Vidal (Rúa Concordia, 12).