As 14 empresas que participaron no programa ‘Yo me prep@ro’, Ada Intervencións, Adecco, Arume, Autoridade Portuaria de Vigo, Campsa Estaciones de Servizo, Carrefour, Fundación Celta de Vigo, Fundación Érguete, Geas Asesores, Ledisson, Maxelga, Psa Retail e Consorcio Zona Franca de Vigo, recolleron esta mañá o diploma ‘Estamos prep@rados’ por dar oportunidades laborais a persoas coa síndrome de Down, recoñecendo desta forma o seu apoio na inserción laboral do colectivo. O acto, organizado por Down Vigo e Fundación Vodafone España, tivo lugar esta mañá na Casa Galega da Cultura.
Estas empresas ofreceron aos alumnos e alumnas a oportunidade de realizar prácticas formativas nas súas instalacións, ou mesmo entrar a formar parte dos seus persoais. E é que a pesar de contar coa formación adecuada, tan só o 5% das persoas coa síndrome de Down do noso país puido demostrar a súa valía laboral; por iso, para o colectivo é indispensable contar co apoio e a colaboración do tecido empresarial local.
Durante o acto, tamén se fixo entrega dun diploma aos 16 mozos e mozas coa síndrome de Down que participaron e superaron o programa. Con este certificado, ambas as entidades acreditan que os mozos e mozas adquiriron as destrezas en TIC´s que lles permitirán formar parte do mercado laboral ordinario: manexar programas ofimáticos, usar diversas aplicacións móbiles ou navegar por Internet e mandar correos, entre outras habilidades.
Tanto as persoas participantes no programa como os empresarios e empresarias compartiron as súas experiencias, destacando as vantaxes que ofrece para as empresas contar con persoas con discapacidade intelectual no seu equipo de traballo, xa que, ademais de realizar as súas tarefas con meticulosidade e moita organización, melloran o clima laboral e transmiten alegría e optimismo aos seus compañeiros e compañeiras. Así, animaron a outras empresas a que aposten por políticas inclusivas que ofrezan oportunidades laborais a traballadores con esta discapacidade intelectual.
No acto interviñeron Dna. María del Carmen López Barrero, presidenta de Down Vigo; Dna. María José Caride Estévez, concelleira de Urbanismo do Concello de Vigo; D. José Ignacio Martínez Alonso, Xefe do Servizo de Dependencia e Autonomía Persoal; D. Carlos López Font, Deputado de Economía, Facenda e Réxime Interior; D. Severino Castromán, Responsable de Administracións Públicas de Vodafone España en Galicia; Dna. Gloria Pérez, Responsable de RRHH do Consorcio Zona Franca de Vigo; e D. Víctor Martínez, Conserxe de Consorcio Zona Franca de Vigo.
O programa ‘Yo me prep@ro’
O obxectivo do programa ‘Yo me prep@ro’, que celebra a súa cuarta edición, é proporcionar ás persoas con discapacidade intelectual as ferramentas e estratexias necesarias en aspectos crave como o uso adecuado das TIC: programas informáticos, navegación por Internet, acceso a redes bancarias informatizadas ou aplicacións móbiles. Todo co obxectivo de axudarlles a salvar a fenda dixital que lles pode condicionar á hora de atopar un posto de traballo normalizado, mellorar a súa autonomía e levar unha vida o máis plena e independente posible.
Nesta edición recibiron formación en novas tecnoloxías 16 persoas usuarias de Down Vigo que adquiriron as competencias necesarias para poder desempeñar un posto de traballo coa normalidade e eficacia de calquera empregado ou empregada. Os participantes de Vigo sumaranse a outros en diversas provincias, alcanzando un total de 960 persoas que recibirán esta formación en toda España.
Na súa formación contan co apoio de catro novos vídeo-titoriais que a través dunha linguaxe sinxela e accesible, reforzarán os coñecementos ofrecidos no proxecto, e permitirán a calquera persoa usuaria comprender como se obtén e para que serve o DNI electrónico, descargar apps para Smartphone ou manexar con soltura aplicacións como WhatsApp.
Tras o éxito de anteriores edicións o proxecto afronta este cuarto ano a nivel nacional con renovado impulso, pois superou as expectativas tanto no número de prácticas conseguidas como na cifra de contratacións alcanzadas: sumados aos contratos laborais para participantes conseguidos nos anos previos, ‘Yo me prep@ro’ conseguiría durante os seus catro anos de execución un total de 319 insercións laborais en empresas ordinarias de todo o país.
Convenio marco
A realización deste proxecto enmárcase dentro do Convenio Marco subscrito o 8 de novembro de 2013 entre Fundación Vodafone España, Plena Inclusión e Down España para a realización de actividades conxuntas en materia de accesibilidade e inserción laboral que redunden en mellorar as condicións de vida das persoas con discapacidade intelectual.
Este convenio busca fomentar a innovación tecnolóxica aplicada á accesibilidade e fai especial fincapé naquelas iniciativas que contribúan á participación das persoas con discapacidade intelectual no ámbito laboral a través de proxectos piloto de innovación e sesións formativas e de divulgación.
