De Vacas, Lucía Pérez, Coro da Rá e o Mago Rafa na conmemoración do 20 aniversario de Down Galicia
Delmiro Prieto, presidente da Federación Down Galicia, e Miguel Ángel Santalices, presidente do Parlamento de Galicia, asinaron esta mañá un protocolo de colaboración para a inserción laboral de persoas coa síndrome de Down e outras discapacidades intelectuais. O acordo fixa as condicións para comezar a desenvolver actividades que promovan e fortalezan as opcións de empregabilidade das persoas usuarias das sete entidades que conforman Down Galicia no Parlamento galego.
“A administración é a casa de todos e todas e, como tal, debe cubrir as necesidades de todos os seus membros”. Así valorou Delmiro Prieto o peche deste protocolo, resaltando o apoio que deben brindar as administracións públicas para a igualdade de todas as persoas que compoñen a sociedade.
Este protocolo é o punto de partida para o proceso de inserción e adaptación efectiva ao posto de traballo de persoas coa síndrome de Down e outras discapacidades intelectuais no Parlamento de Galicia. Para iso, impartiranse cursos de formación específicos previos ao comezo da prestación de servizos na Administración; darase apoio no proceso de inserción e adaptación efectiva ao posto de traballo das persoas traballadoras coa síndrome de Down, así como do seu entorno laboral; farase un seguimento do desempeño da actividade laboral, incluíndo formación continua en competencias instrumentais, transversais e laborais para este colectivo e de acordo cos resultados da detección de necesidades formativas; e realizaranse obradoiros prácticos de intercambios de experiencias dirixidos ao persoal que realiza funcións de referencia na súa contorna de traballo.
Primeira oposición dirixida a persoas con discapacidade intelectual
O Parlamento de Galicia contemplou en 2017 por primeira vez na súa historia a reserva de prazas para persoas con discapacidade intelectual coa convocatoria dunhas oposicións dirixidas a este colectivo.
Así, a sede do Parlamento de Galicia acolleu o pasado marzo o primeiro exercicio deste proceso selectivo para cubrir unha praza de uxier.
Entradas relacionadas
