A Federación Down Galicia recibiu hoxe, nun acto presidido pola Infanta Doña Elena de Borbón, un recoñecemento da Fundación Mapfre pola súa traxectoria a prol da inclusión laboral das persoas coa síndrome de Down e outras discapacidades intelectuais.
Este evento, no que tamén foron galardoadas outras entidades sociais e varias empresas galegas, serviu tamén de plataforma para que a Fundación Mapfre presentase o seu programa social de emprego e para que se desen a coñecer varias insercións laborais de éxito de persoas con discapacidade en empresas ordinarias da súa contorna.
Así, María José España, responsable de emprego da Asociación Down Coruña, compartiu con tódalas persoas asistentes a experiencia de Tania, unha rapaza con discapacidade intelectual, que foi contratada en setembro de 2013 por Amofre S.L. para traballar no Burger King do centro comercial Marineda de A Coruña.
A xerente de Down Galicia, Sonia Caldas Novás, foi a encargada de recoller o galardón en nome da Federación e aproveitou a súa intervención para agradecer o recoñecemento, ao tempo que fixo fincapé na necesidade de implicar a toda a sociedade para que as persoas con discapacidade intelectual poidan acceder ao mercado laboral de xeito normalizado.
O proxecto de emprego de Down Galicia púxose en marcha no ano 2002 e está orientado a facilitar que as persoas con discapacidade teñan un traballo en empresas ordinarias. Para que estas insercións sexan efectivas cóntase coa figura dun preparador ou preparadora laboral (profesional que se encarga de ensinar as tarefas á persoa con discapacidade no posto de traballo), e que non supón custe algún para a empresa. Este tipo de apoio no posto é gradual e vaise retirando ata desaparecer por completo a medida que a persoa con discapacidade vai adquirindo autonomía nas súas tarefas.
No acto, celebrado nas instalacións da Confederación de Empresarios de A Coruña, tamén foi recoñecido o labor das empresas Solidariedade Internacional de Galicia, Gaeiro Construcciones S.L. e Amofre S.L.; da empresaria Lilia Gonçalves Faria; da residencia Domusvi A Coruña; da Confederación de Empresarios COFER Ferrol; e da Federación Feafes Galicia.
