Down Vigo e a Escola Universitaria CEU de Maxisterio celebraron esta mañá o acto de fin de curso do Programa ALIDA, un proxecto de colaboración de dous cursos de duración que ten como principal obxectivo mellorar a inclusión socio-laboral de persoas coa síndrome de Down e discapacidade intelectual. O evento contou coa presenza do alcalde de Vigo, Abel Caballero, que destacou “o compromiso das autoridades públicas co emprego inclusivo e a igualdade de oportunidades real”. Durante a súa intervención, puxo en valor o avance social en materia de sensibilización e compromiso coa empregabilidade de persoas con discapacidade.
O acto de clausura tamén contou coas intervencións de, entre outros, César Pérez Ares, xefe territorial da Consellería de Educación; Mª Jesús Ayuso, directora da Escola Universitaria CEU de Maxisterio; e Mª Carmen López Barrero, presidenta de Down Vigo.
O evento enmarcouse dentro dunha Xornada de Portas Abertas para profesionais e familias, contando coa presenza de familias interesadas no Programa ALIDA e responsables de entidades como ASPANAEX (Asociación en favor das Persoas con Discapacidade Intelectual da provincia de Pontevedra) ou o C.E.E. Saladino Cortizo.
O Programa ALIDA, unha experiencia inclusiva
Desde o mes de xaneiro, o alumnado asistente participou na vida diaria da Escola Universitaria CEU de Maxisterio, con formación en habilidades socio-laborais e novas tecnoloxías así como actividades inclusivas e de colaboración tales como unha obra de teatro ou diversos talleres para fomentar a creatividade e as habilidades manipulativas. As materias son impartidas por docentes voluntarios da Escola Universitaria CEU de Maxisterio e profesionais de Down Vigo, compartindo aula e actividades co resto de estudantes.
