As entidades sociais continuarán pechadas ata que a Xunta de Galicia considere viable a súa reapertura
Esta mañá, 60 persoas usuarias de entidades Down en Galicia recibiron no Palacio de Congresos e Exposicións de Galicia un diploma acreditativo da súa participación en algún dos tres proxectos de formación prelaboral levados a cabo durante o último ano pola Federación Down Galicia.
O acto, presidido polo conselleiro de Política Social, José Manuel Rey Varela, e pola Directora Xeral de Maiores e Persoas con Discapacidade, Fabiola García Martínez, contou coa participación de persoas usuarias de varias entidades do ámbito social, participantes das distintas accións formativas financiadas pola propia Consellería a través das subvencións destinadas para o desenvolvemento de proxectos de asesoramento e formación de persoas con discapacidade na Comunidade Autónoma de Galicia. Estas actuacións están cofinanciadas polo Fondo Social Europeo no marco do programa operativo FSE Galicia 2014-2020.
Nesta ocasión, a Federación levou a cabo tres proxectos dos que puideron beneficiarse 101 persoas usuarias das distintas entidades Down de Galicia, e que contaron cun financiamento total de 120.573,71€ para a súa realización.
O primeiro deles centrouse na preparación de oposicións autonómicas e estatais e tivo como principal obxectivo garantir aos participantes a adquisición e mellora das competencias necesarias para presentarse a un proceso de oposición e superalo con éxito.
O segundo tiña por obxecto mellorar a alfabetización e exercitar as habilidades instrumentais básicas das persoas participantes, o que lles permitirá unha maior competencia social á hora de desenvolverse de maneira autónoma en actividades da súa vida cotiá.
Por último, o proxecto Formación prelaboral e estimulación cognitiva de persoas con síndrome de Down e/ou discapacidade intelectual tiña como meta mellorar e exercitar as funcións cognitivas nas persoas participantes como base para lograr unha mellora da autonomía, das habilidades prelaborais e da súa participación na comunidade.
A inserción laboral das persoas con discapacidade intelectual e síndrome de Down é un proceso complexo. Estes proxectos ofrécenlle aos seus participantes a oportunidade de adquirir coñecementos e ferramentas que lles permitan ter a posibilidade de dispoñer dun traballo fixo, mellorando así a súa calidade de vida.
Desde Down Galicia non queremos deixar de destacar que este tipo de convocatorias son un gran avance, pois permiten financiar proxectos formativos orientados á adquisición de formación prelaboral e de habilidades para o desenvolvemento de actividades na vida cotiá, permitindo deste xeito unha preparación para unha futura inserción socio-laboral.
Entradas relacionadas
