Fotografía: Concello de Ferrol
Teima Down Ferrol e o Concello da cidade asinaron onte un convenio de colaboración entre ambas entidades para o desenvolvemento do programa “Participando. Inclusión na vida adulta” que a asociación leva a cabo.
Este acordo foi asinado no Salón de Recepcións do Pazo Municipal de Ferrol polo alcalde, Jorge Suárez; a concelleira de Benestar Social, Saínza Ruíz; e a presidenta de Teima Down Ferrol, Patricia Serantes.
A achega, que ascende aos 35.000€, irá destinada ao desenvolvemento deste programa, que apoia ás persoas usuarias da entidade a acadar unha vida máis autónoma e independente mediante a participación na súa comunidade.
Así, este convenio permitirá desenvolver os seguintes programas e actividades:
- Apoios ao desprazamento autónomo
- Emprego de recursos comunitarios
- Autonomía doméstica
- Xestión Económica
- Habilidades Sociais e Comunicación
- Promoción e apoio ao ocio inclusivo e normalizado
- Habilidades básicas de lectoescritura e cálculo
- Manexo das tecnoloxías de comunicación
- Atención as familias
- Actuacións en relación con envellecemento
O alcalde de Ferrol trasladou a súa admiración a Teima Down Ferrol por ser “un referente social no municipio” e destacou á entidade “como exemplo de esforzo e superación” dende hai case 25 anos.
A concelleira de Benestar Social quixo valorar “a necesidade de apoiar o traballo que desenvolven as asociacións e entidades de persoas con discapacidade, así como de coordinar accións para a mellora da calidade de vida, a autonomía e o acceso aos recursos deste colectivo”.
Patricia Serantes, pola súa banda, agradeceu ao Concello o apoio continuado ao traballo da entidade e, en definitiva, ás súas vidas, xa que “a xunta directiva de Teima está formada por pais e nais de persoas coa síndrome de Down”. A presidenta da entidade tamén quixo destacar o reto que supón o envellecemento das persoas do colectivo “porque xa empezan a chegar aos 60 anos e temos que tentar que os seus últimos anos de vida sexan iguais que os do resto de persoas”.
