Onte pola mañá coñeciamos o segredo mellor gardado do Concello de Ferrol, a lectura do pregón que dá inicio ás festas da cidade.
O concelleiro de festas, Suso Basterrechea, desvelou que os pregoeiros deste ano serán membros da asociación Teima Down Ferrol. A lectura terá lugar ás dez da noite do venres, no mesmo palco da praza de España no que media hora máis tarde actuará a cantautora canaria Rosana.
No acto de presentación dos pregoeiros participaron Daniel e Lucía, dous membros da asociación que deron as grazas ao Concello por darlles visibilidade e convidaron a todos os ferroláns e ferrolás a gozar das festas desde o inicio. «Gústanos estar con todos e como todos», manifestou Daniel, engadindo que senten moi honrados de que os elixisen «porque nos encanta a festa».
A proposta partiu da concellería de Servizos Sociais e foi secundada polo resto do goberno, segundo explicaron Suso Basterrechea e o alcalde, Jorge Suárez, apostilando que a elección de Teima pretende representar a todos os colectivos sociais que traballan en Ferrol.
