Down Pontevedra “Xuntos” recibiu hoxe, nun acto presidido pola Infanta Dona Elena de Borbón, unha mención especial da Fundación Mapfre pola súa traxectoria a favor da inclusión laboral das persoas coa síndrome de Down e outras discapacidades intelectuais.
Este evento, no que tamén foron galardoadas outras entidades sociais e varias empresas galegas, serviu tamén de plataforma para que a Fundación Mapfre presentase o seu programa social de emprego e para que se desen a coñecer varias insercións laborais de éxito de persoas con discapacidade en empresas ordinarias da súa contorna.
O presidente de Down Pontevedra “Xuntos”, Manuel Pérez Cabo, foi o encargado de recoller o galardón en nome da Asociación e aproveitou a súa intervención para agradecer o recoñecemento, á vez que incidiu na necesidade de implicar a toda a sociedade para que as persoas con discapacidade intelectual poidan acceder ao mercado laboral en igualdade de condicións.
No acto, celebrado nas instalacións do Real Club Náutico de Sanxenxo, tamén foi recoñecida o labor das empresas Carmencitas Moda Infantil, Grupo Informático de Galicia, Chester Mobiliario, Alcampo Vilagarcía de Arousa e Serviocio, polo seu compromiso coa contratación de persoas con discapacidade e daquelas en situación de desemprego de longa duración.
Pola súa banda, a Infanta Dona Elena transmitiu os seus máis sinceros parabéns a todas as entidades galardoadas “pola súa implicación e compromiso coa contratación de persoas en situación de desemprego e en risco de exclusión social”; un agradecemento, sinalou, “que se fai extensivo ás máis de 7.600 empresas participantes no Programa Social de Emprego de Fundación Mapfre”.