Down Galicia estrea un vídeo explicativo sobre a nova reforma lexislativa en materia de discapacidade
Esta mañá vivimos un fito histórico na defensa dos dereitos das persoas con discapacidade: a aprobación da reforma da Lei Orgánica de Réxime Electoral Xeral (LOREG) que permitirá eliminar a posibilidade de que, nos procedementos de incapacitación legal, os xuíces poidan privar do dereito de voto a determinadas persoas por motivos asociados á súa discapacidade. Representantes do movemento asociativo da discapacidade e decenas de persoas con discapacidade foron testemuñas do debate desde a tribuna de invitados do Congreso dos Deputados.
Tras esta aprobación por unanimidade (con 142 votos a favor), o texto chegará ao Senado, onde con toda probabilidade será aprobado definitivamente. Despois, volverá á Cámara baixa onde se podería producir a aprobación definitiva da reforma da Lei Orgánica 5/1985 do Réxime Electoral Xeral (LOREG). Se se cumpren os prazos establecidos, a reforma da LOREG entraría en vigor antes do Día Internacional e Europeo das Persoas con Discapacidade (3 de decembro).
Unha vez feita efectiva, os xuíces e tribunais non terán capacidade de decidir se unha persoa reúne as aptitudes para poder exercer o seu dereito ao voto, xa que a modificación desta lei suprime os apartados que, no seu artigo terceiro, establecen que carecen do dereito ao voto “os declarados incapaces en virtude de sentenza xudicial firme”. Segundo datos da Oficina do Censo Electoral, case 100.000 persoas con discapacidade atoparíanse nesta situación e, por tanto, privadas do dereito político fundamental a exercer o sufraxio.
Nas inmediacións do Congreso, responsables das entidades e persoas con discapacidade e as súas familias a título individual quixeron estar presentes para mostrar a súa satisfacción polo feito de que o Congreso dos Deputados dese luz verde a esta reivindicación. Estas persoas portaron caraveis e puideron conversar de maneira informal con deputados de diferentes grupos parlamentarios.
#MiVotoCuenta
Down España, o Comité Español de Representantes de Persoas con Discapacidade (CERMI) e Plena Inclusión celebraron en febreiro de 2017 unha concentración ante o Tribunal Constitucional co lema #MiVotoCuenta que contou co apoio de máis de 500 persoas.
Por mor desta concentración e a suxestión do CERMI, a Asemblea de Madrid elevou unha iniciativa lexislativa, promovida polo Grupo Parlamentario Socialista e aprobada no parlamento rexional co respaldo de todos os grupos políticos, ao Congreso dos Deputados. O debate tivo lugar en novembro do ano pasado e recibiu o apoio unánime dos deputados e deputadas. En setembro, a reforma da lei superaba o seu primeiro paso lexislativo co ditame favorable da Comisión Constitucional da Cámara baixa e a súa posterior aprobación que tivo lugar hai unha semana.
O pasado mes de xullo, era o Consello de Europa o que se pronunciaba e advertía a España que non pode privar do dereito ao voto ás persoas con discapacidade. Así o manifestaba a comisionada europea de Dereitos Humanos do Consello de Europa, Dunja Mijatovic, nas súas observacións escritas presentadas ante o Tribunal Europeo de Dereitos Humanos sobre o caso da española María del Mar Caamaño Vale contra España por retirarlle este dereito un tribunal.
Entradas relacionadas
