Down Galicia recibe un dos premios “Líderes en calidade” outorgados por Expourense
A Federación Down Galicia cumpre dúas décadas de intenso traballo, de logros e progresos. A inclusión real na sociedade está a deixar de ser unha utopía para converterse nunha realidade, aínda que queda moito camiño por percorrer.
Desde o seu nacemento, o obxectivo prioritario da Federación foi conseguir que as persoas coa síndrome de Down e outras discapacidades intelectuais acadasen as máis altas cotas de auto xestión posibles para levar unha vida autónoma, tomar as súas propias decisións e formar parte da sociedade dunha maneira visible e inclusiva. Nestes vinte anos, Down Galicia e as súas entidades membro nunca deixaron de loitar, xunto con todos os estamentos sociais, para alcanzar este obxectivo.
Un gran evento para celebrar o 20 aniversario
Para celebrar o camiño percorrido, a Federación organiza esta fin de semana a Festa pola Inclusión, un gran evento lúdico-festivo repleto de música, humor, maxia e reivindicacións, que incluirá a entrega dos V Premios Down Galicia e a proxección da curta documental “Xeración Down”, na que se porán de manifesto os cambios sociais acontecidos ao redor da síndrome de Down nestas dúas décadas.
O cartel deste acontecemento único contará coas actuacións desinteresadas de De Vacas, un dos grupos galegos do momento, a cantante lucense Lucía Pérez, o divertido Coro da Rá e o Mago Rafa.
Este evento único, conducido por Sonia López e persoas coa síndrome de Down e outras discapacidades intelectuais usuarias das entidades Down, estará aberto a toda a sociedade galega e terá lugar este sábado 20 de outubro ás 20:00 horas no Auditorio Abanca de Santiago de Compostela (Rúa do Preguntoiro, nº 23).
O recadado coas entradas, que teñen un custe de 10€, será integramente destinado ós programas que Down Galicia e as súas entidades levan a cabo e que actualmente dan servizo a 658 familias.
Calquera que o desexe, pode facerse coa súa entrada a través da web de Ataquilla de Abanca, no 902 504 500 ou nos seguintes puntos de venta físicos: Sede Afundación en Santiago de Compostela (R/ Vilar, 19), Sede Afundación en Vigo (R/ Policarpo Sanz, 26), Sede Afundación en A Coruña (Cantón Grande, 8) e Sede Afundación en Ourense (Praza Maior, 4).
E, por suposto, o propio día do evento na taquilla do Auditorio Abanca.
Ademais, todas aquelas persoas que non poidan asistir á Festa pola Inclusión, pero queiran colaborar coa Federación nunha data tan sinalada, poderán facelo a través de Paypal ou da Fila 0 habilitada para a ocasión: ES6920800376673040011066 (ABANCA).
Toda a información relativa a este evento e á traxectoria da Federación nestas últimas dúas décadas está dispoñible no “Especial 20 aniversario” da web de Down Galicia: www.downgalicia.org/20-aniversario
Colaboradores do evento
Para a consecución deste evento, Down Galicia contou con moitos colaboradores dos eidos público e privado que aportaron o seu grao de area mediante achegas económicas ou en especie.
Así, a Consellería de Política Social, Afundación-Obra Social Abanca, Lau Creaciones, Fontecelta, Toldos Gómez, Stampa, Abella Creativa e Eco Escuela de Arte colaboraron coa posta en marcha do 20 aniversario da Federación.
Entradas relacionadas
