A Deputación de Ourense aposta de novo pola inserción laboral das persoas coa síndrome de Down na provincia ourensá
Máis de 400 persoas déronse cita esta tarde-noite no Auditorio Abanca de Santiago de Compostela para celebrar o 20 aniversario da Federación Down Galicia. A entidade, que neste 2018 cumpre dúas décadas de intenso traballo a prol da inclusión real na sociedade das persoas coa síndrome de Down e outras discapacidades intelectuais, nunca deixou de loitar, xunto con todos os estamentos sociais, para alcanzar este propósito.
Así, desde o seu nacemento, o obxectivo prioritario da Federación foi conseguir que as persoas coa síndrome de Down e outras discapacidades intelectuais acadasen as máis altas cotas de auto xestión posibles para levar unha vida autónoma, tomar as súas propias decisións e formar parte da sociedade dunha maneira visible e inclusiva.
Un gran evento para celebrar o 20 aniversario
Para celebrar o camiño percorrido, a Federación organizou este sábado a Festa pola Inclusión, un gran evento lúdico e festivo repleto de música, humor, maxia e reivindicacións. Este acontecemento único, conducido pola presentadora Sonia López e persoas coa síndrome de Down e outras discapacidades intelectuais usuarias das entidades Down, contou coas actuacións desinteresadas da cantante lucense Lucía Pérez, o divertido Coro da Rá, o Mago Rafa e o grupo De Vacas.
Lucía Pérez, representante española de Eurovisión no ano 2011, compartiu con tódalas persoas asistentes tres temas do seu novo disco “Quince soles”, mentres que o magnífico Coro da Rá, dirixido por Ramón Bermejo, exhibiu o seu grande talento con tres pezas a cinco voces.
O tempo para o ilusionismo chegou da man do Mago Rafa, que conseguiu deixar a todo o mundo coa boca aberta cos seus incribles trucos de maxia.
Por último, o grupo compostelá De Vacas pechou este evento solidario cos seus éxitos “Unha noite máis”, “Amodiño” e “De noite e de día”, cos que conseguiron poñer a todo o público en pé.
A Festa pola Inclusión contou tamén coa estrea da curta documental “Xeración Down”, que plasma todo o que significou para as familias a creación e o desenvolvemento do movemento Down en Galicia a todos niveis. Sete rapaces e rapazas de todas as entidades que conforman Down Galicia e as súas familias explican mediante testemuños a súa evolución grazas aos apoios recibidos nas súas asociacións e por parte da Federación durante as últimas dúas décadas.
A recadación obtida coas entradas, que tiñan un custe de 10€, será integramente destinado ós programas que Down Galicia e as súas entidades levan a cabo e que actualmente dan servizo a 658 familias de toda a comunidade autónoma.
Premios Down Galicia
A Federación tamén entregou esta noite os V Premios Down Galicia, que teñen por obxecto recoñecer o labor a prol da promoción da autonomía e igualdade das persoas coa síndrome de Down, realizado tanto por institucións e entidades como por persoas particulares.
O premio na categoría institucional foille concedido á compañía de recambios para o automóbil Feu Vert, por ser a primeira empresa que contactou por iniciativa propia con Down Galicia para interesarse polo seu programa de Emprego con Apoio. Ademais, nestes momentos ten contratadas a cinco persoas coa síndrome de Down e outras discapacidades intelectuais nas súas tendas galegas.
Mentres, na categoría de persoa particular, o galardón foille concedido a José Ramón Vázquez, antigo coordinador da oficina de voluntarios da zona Noroeste de BBVA, pola súa colaboración na implantación e continuidade do programa de prácticas formativas para persoas coa síndrome de Down e outras discapacidades intelectuais nas oficinas de BBVA de toda Galicia.
Co gallo do 20 aniversario, a Federación entregou un Premio Extraordinario que recaeu en Miguel Carballa e Eloísa Teijeira, por ter colaborado ao longo de moitos anos de forma desinteresada no camiño de Down Galicia a prol da inclusión educativa.
‘#EstáNaTúaMan’, a campaña de sensibilización de Down Galicia
‘#EstáNaTúaMan’ é a campaña de sensibilización coa que a Federación Down Galicia quere concienciar sobre a importancia da inclusión das persoas coa síndrome de Down e outras discapacidades intelectuais. A súa intención é que todo o mundo entenda que está na man de cada un converter esta sociedade nun lugar no que se respecten os dereitos de todas as persoas e no que se aprenda a ver a este colectivo sen prexuízos nin estereotipos.
‘#EstáNaTúaMan’ conta co apoio de rostros coñecidos do mundo da música, da televisión e do deporte do noso país, como os cantantes Amaia e Alfred (Operación Triunfo 2017), a actriz Isabel Naveira ou a presentadora Nieves Rodríguez.
Colaboradores do evento
Para a consecución deste evento, Down Galicia contou con moitos colaboradores dos eidos público e privado que aportaron o seu grao de area mediante achegas económicas ou en especie.
Así, a Consellería de Política Social, Afundación-Obra Social Abanca, Lau Creaciones, Fontecelta, Toldos Gómez, Stampa, Abella Creativa e Eco Escuela de Arte colaboraron coa posta en marcha do 20 aniversario da Federación.
Entradas relacionadas
