Fotografía: Alberto López

Down Lugo inaugurou onte en Viveiro a mostra fotográfica “Enfocando historias”, un proxecto levado a cabo por persoas usuarias da asociación en colaboración co voluntariado da Fundación Telefónica e ASTELU (Asociación Senior Telefónica de Lugo).

“Enfocando historias”, dirixido pola fotógrafa Aleksandra Dmitrieva, estivo realizado en catro fases. Nun primeiro momento, as persoas participantes recibiron clases teóricas para familiarizarse con conceptos básicos de fotografía e comezaron coa labor de crear historias. Posteriormente, viaxaron a Barreiros (Lugo) e á praia de Peñarredonda (Asturias) para plasmar en imaxes esas historias. A terceira fase dedicouse a seleccionar as fotografías e ao tratamento das mesmas con diferentes programas e, por último, prepararon a mostra para compartila a través de distintas exposicións.

Esta mostra englóbase dentro das actividades do ciclo “SuperArte” organizado polo concello viveirense e poderá visitarse ata o 16 de novembro na Sala Multiusos da Biblioteca Pública Municipal.

Horario:
Luns a venres de 9:00 a 14:30 e de 16:30 a 20:30 e sábados de 10:00 a 14:00.