Down Galicia recibe un dos premios “Líderes en calidade” outorgados por Expourense
A Federación Down Galicia vén de editar un folleto informativo que recolle as principais recomendacións sanitarias para as persoas adultas coa síndrome de Down. Neste tríptico, as persoas pertencentes ao colectivo e as súas familias poderán informarse de maneira moi sinxela e visual sobre a periodicidade de atención, revisión e vacinación en maiores de 18 anos.
A vida das persoas coa síndrome de Down cambiou radicalmente nos últimos decenios. Non só se prolongou ata alcanzar unha media de esperanza de vida próxima aos sesenta anos, senón que a calidade desa vida mellorou ostensiblemente, podendo alcanzar en moitos casos altos niveis de autonomía persoal.
Unha atención adecuada ás necesidades sanitarias é fundamental para poder vivir dun xeito máis pleno. Como xa se fixo fincapé en numerosas ocasións, as persoas coa síndrome de Down non teñen unha enfermidade, pero contan cun maior risco de padecer certas patoloxías. A aplicación de programas de medicina preventiva, mediante controis e exploracións periódicas e sistemáticas, é especialmente importante, pois con eles pódense evitar, aliviar ou corrixir os problemas de saúde tan pronto como vaian aparecendo. Polo tanto, a atención á saúde durante esta etapa é igual de importante que na infancia, previndo e tratando de xeito anticipado posibles problemas de saúde.
O obxectivo xeral da posta en circulación deste folleto informativo é mellorar a prevención e a detección precoz de calquera alteración ou enfermidade en persoas coa síndrome de Down, pero tamén unificar a información existente referida aos controis de saúde do colectivo, homoxeneizar o calendario mínimo de revisións sanitarias e informar e dar apoio ás persoas implicadas e ás súas familias.
Consulta o folleto informativo aquí
Entradas relacionadas
