Down Pontevedra Xuntos pecha o ano coa contratación de catro das súas persoas usuarias
O pasado mes de xuño, Matriuska Producciones e Down Pontevedra Xuntos asinaron un convenio de colaboración co fin de promover a inclusión socio-laboral en contornas ordinarias de persoas coa síndrome de Down e outras discapacidades intelectuais.
Grazas a este acordo, Xiana Moreira Barbosa, participante do Programa de Emprego con Apoio que promove a entidade Down Pontevedra Xuntos, comezou o pasado 10 de outubro un período de prácticas na produtora desempeñando o posto de auxiliar de produción audiovisual. Xiana acude todos os mércores á oficina que Matriuska Producciones ten no Coworking Espacio Arroelo, en Pontevedra, e as súas principais tarefas abranguen desde o arquivo e clasificación de documentación ata a inscrición online de películas en festivais.
Dani Froiz, produtor de Matriuska Producciones, quixo destacar que “a industria do cine pode contar perfectamente coas persoas con discapacidade”. A produtora coñeceu o traballo de Xuntos no eido do emprego con apoio no coworking Espacio Arroelo, onde traballa como ordenanza Cecilia, outra usuaria do programa, e onde a empresa ten a súa oficina, e en seguida souberon que querían incluír a unha persoa con discapacidade intelectual no seu equipo de traballo. Ademais, Froiz non descarta que as prácticas dean paso a contratacións temporais en festivais cinematográficos.
Pola súa parte, o presidente de Down Pontevedra Xuntos, Manuel Pérez Cabo, resalta a importancia que os convenios de colaboración teñen para a entidade, xa que “é vital contar co apoio do tecido empresarial da contorna para que as persoas coa síndrome de Down e outras discapacidades intelectuais consigan unha verdadeira inclusión socio-laboral”.
O programa de emprego de Down Pontevedra Xuntos
O programa de emprego con apoio de Xuntos facilitou 26 contratacións desde inicios de ano, sendo 11 contratos indefinidos. A través destas oportunidades, 16 persoas usuarias das 18 que conforman o programa de Emprego con Apoio da entidade puideron adquirir experiencia en postos tan variados como auxiliar en unhas termas, masaxista, ordenanza, monitor de comedor escolar, entre moitos outros.
Desde o ano 2002, as entidades Down en Galicia desenvolven o programa Emprego con Apoio, deseñado para atender especificamente as necesidades e barreiras que as persoas coa síndrome de Down e outras discapacidades intelectuais atopan á hora de intentar acceder ao mercado laboral ordinario.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un posto, contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros e compañeiras de traballo e na mediación na relación con eles para que se desenvolva de xeito positivo e natural.
Matriuska Producciones
Con sede en Pontevedra, a produtora cinematográfica Matriuska Producciones promove desde 2005 o talento de novos creadores e as novas tecnoloxías. Os seus traballos enmárcanse principalmente na ficción, a animación, o documental e a publicidade, aínda que tamén prestan outros servizos como pos-produción, edición dixital ou aluguer de equipamentos audiovisuais.
Entradas relacionadas
