Renfe colabora con Down Galicia con motivo do Día Mundial da síndrome de Down
A Federación Down Galicia vén de editar a súa “Guía de estilo sobre persoas coa síndrome de Down e outras discapacidades intelectuais”, un manual que ten por obxecto positivizar e concienciar sobre a terminoloxía referida ás persoas coa síndrome de Down e outras discapacidades intelectuais tras a evolución experimentada por este colectivo nas últimas décadas, nas que pasou de estar oculto a unha situación onde se busca a súa inclusión na sociedade da que forman parte.
Os avances conseguidos en outros ámbitos, como o educativo ou o laboral, non se viron acompañados dun cambio na linguaxe que axudase a eliminar os prexuízos e os estereotipos vencellados ao mundo da discapacidade. E é que a linguaxe non é soamente unha cuestión de forma, senón tamén de fondo. As palabras, que son capaces de erixir as máis sólidas barreiras mentais, crean realidades e poden chegar a transmitir un gran número de aspectos negativos.
Trátase de empregar as palabras correctas e non estigmatizar nin manter termos negativos ou simplemente insultantes. Esta guía de estilo intenta, a través das súas páxinas, aclararlle ao lector ou lectora varios dos mitos máis comúns vinculados ás persoas coa síndrome de Down, así como ofrecerlle recomendacións xenéricas e propostas máis concretas que poidan empregar ao referise a persoas coa síndrome de Down ou outras discapacidades intelectuais.
Darlle solución a esta situación está na man de cada un e cada unha de nós, sen distinción. Por iso, esta guía de estilo vai destinada a todas aquelas persoas que se relacionen con unha persoa coa síndrome de Down ou outra discapacidade intelectual e tamén ás que, polo motivo que sexa, fan mención a estas. Deste xeito, Down Galicia quere destinar este manual ás propias entidades sociais, ás empresas e entidades que colaboran coa labor das entidades Down, ás administracións públicas e, por suposto, ao resto da sociedade. Pero, sobre todo, aos medios de comunicación, cuxa capacidade de influencia neste aspecto é superior a de calquera outro axente nesta sociedade.
Cambio de terminoloxía no Dicionario da Real Academia Galega
Down Galicia leva desde o ano 1998 loitando pola inclusión, a igualdade e a non discriminación das persoas coa síndrome de Down e outras discapacidades intelectuais.
En xullo de 2016, e tomando como punto de partida unha petición da Federación, a Real Academia Galega decidiu, tras unha reunión do seu Seminario de Lexicografía, suprimir ou modificar varias palabras ou acepcións pexorativas referidas á síndrome de Down, que asociaban a alteración cromosómica con acepcións como debilidade mental ou deficiencias físicas.
Esta guía de estilo pretende ser un paso máis cara a utilización de unha linguaxe máis inclusiva e respectuosa para con todos os membros da nosa sociedade.
Entradas relacionadas
