Doce persoas usuarias de entidades Down de Galicia realizarán prácticas en dependencias da Xunta este 2019
A riqueza dunha sociedade atópase na pluralidade e na diversidade. Con este pretexto, a asociación Teima Down Ferrol está a organizar a xornada de sensibilización “En primeira persoa”, mediante a que intentarán achegar a todos e todas as ferrolás a importancia de construír unha sociedade máis inclusiva.
Esta xornada, de acceso libre e gratuíto ata completar aforo, terá lugar a tarde do vindeiro venres 30 de novembro na sede de Afundación da cidade ferrolá (Praza da Constitución, s/n).
A través de experiencias contadas en primeira persoa, usuarios e usuarias da entidade queren dar a coñecer as súas vivencias en distintos ámbitos, resaltando o papel e o valor da comunidade para a súa inclusión. Deste xeito, poderemos escoitar da boca dos seus propios protagonistas seis historias sobre participación, educación, traballo, actividades no tempo de lecer ou no ámbito familiar e expectativas ante a etapa do envellecemento.
Xunto a todas elas sentaranse outros relatores e relatoras que resaltarán o papel das contornas como clave para o éxito do proceso de inclusión. Así, na xornada estará Pilar Ramudo, unha profesora de secundaria que nos falará da traxectoria dunha rapaza coa síndrome de Down que promocionou ata 4º da ESO ao mesmo ritmo que os seus compañeiros e compañeiras sen discapacidade. Escoitaremos tamén a Reyes Cortizas, coordinadora en Alcampo Ferrol, que contará o funcionamento do hipermercado para facilitar a inclusión de Ricardo, usuario da asociación, e a Flavio Augusto Álvarez, profesor de salsa de Manolo desde hai anos.
Na xornada tamén participarán a coordinadora da sede de Afundación, Tatiana Puente; o Director Xeral de Inclusión Social, Arturo Parrado; o alcalde de Ferrol, Jorge Suárez; a concelleira de Benestar Social, Saínza Ruíz; e a presidenta de Teima Down Ferrol, Patricia Serantes.
Consulta aquí o programa.
Entradas relacionadas
