Aberto o prazo de inscrición para a Xornada “Educación Inclusiva: Deseño Universal para a Aprendizaxe e boas prácticas”
A Federación Down Galicia recibiu onte, dentro da programación do XX Congreso Estatal de Voluntariado celebrado no Recinto Ferial Expourense, unha das mencións honoríficas que a Xunta de Galicia entregaba a entidades de acción voluntaria de toda a comunidade autónoma.
Con estes galardóns réndese homenaxe ao traballo levado a cabo polas entidades de acción voluntaria polo seu esforzo do día a día e a súa loita e labor indispensable na sociedade galega.
Xunto con Down Galicia, recibiron esta mención Aspronaga; a Agrupación de Voluntarios de Protección Civil de A Mezquita; a Asociación Española contra o Cancro (AECC); o Centro Cultural, Artístico e Recreativo de Valladares; a Federación de Asociacións de Persoas Xordas de Galicia (FAXPG); o Centro de Desenvolvemento Rural de O Viso; a Asociación de Amigos da Terra Galicia Xuventude; a Asociación Integra para a diversidade funcional das comarcas de Bergantiños, Terras de Soneira e Fisterra; a Confederación Galega de Persoas con Discapacidade (COGAMI); e a Federación Alzhéimer Galicia (FAGAL).
XX Congreso Estatal de Voluntariado
Baixo o lema “Enlázate ao Voluntariado”, o XX Congreso Estatal de Voluntariado quixo poñer énfase na importancia que as accións altruístas teñen para avanzar cara unha sociedade mellor e amosouse como unha invitación á unión progresiva da acción voluntaria como elemento dinamizador e de transformación social.
Nesta edición perseguíanse varios obxectivos: establecer un espazo de reflexión sobre o futuro do voluntariado, poñer en valor o voluntariado de Galicia como a comunidade autónoma máis comprometida e con maior índice de participación en materia solidaria e destacar o voluntariado como un dos noso activos máis importantes para a creación dunha sociedade mellor.
O programa destas dúas xornadas estivo repleto de mesas redondas, talleres e relatorios con expertos de todo o mundo, pero tamén incluíu actuacións musicais e recoñecementos a persoas e entidades vencelladas ao mundo do voluntariado.
Participación do Grupo de Teatro de Down Compostela
Tras o éxito conseguido o pasado xuño na Casa da Cultura de Milladoiro e este mesmo outubro no Teatro Principal de Santiago, o Grupo de Teatro Down Compostela volveu a subirse a un escenario o pasado mércores para representar a súa aclamada obra “A mansión de José Cruz”.
Homes lobos, vampiros, zombis ou asasinos en serie tentaron de novo amedrentar a Juan Sen Medo nas terroríficas e divertidas noites que transcorren na mansión de José Cruz. Unha divertida trama na que se implican todos e cada un dos máis de vinte actores e actrices que forman o Grupo de Teatro Down Compostela.
Entradas relacionadas
