Unha app para fomentar a autonomía e empregabilidade das persoas coa síndrome de Down e discapacidade intelectual
Down Vigo conmemora este 3 de decembro o Día Internacional das Persoas con Discapacidade facendo un balance positivo das actuacións levadas a cabo durante 2018.
No que respecta ao ámbito laboral, máis de 25 persoas da entidade lograron durante este ano un novo contrato en empresa ordinaria, o que reflicte o éxito da metodoloxía do Emprego con Apoio, unha modalidade de inserción laboral na que un preparador ou preparadora acompaña á persoa traballadora durante todo o proceso. Neste punto, destacan as primeiras prácticas laborais internacionais das que gozaron dous membros de Down Vigo, cunha experiencia de tres semanas no Hotel Meliá Milano (Italia).
E se o emprego é un alicerce básico no proxecto vital de calquera persoa, con ou sen discapacidade, non o é menos a experiencia de vivir de forma autónoma. Por iso, Down Vigo desenvolve un proxecto de Vida Independente no que 22 membros da entidade prepáranse para unha posible emancipación, da que xa gozan cinco persoas.
O Programa ALIDA, primeira experiencia de formación superior para persoas con discapacidade
En 2019 finalizará a primeira promoción do Programa ALIDA, unha formación superior teórico-práctica de dous anos, impartida en colaboración coa Escola Universitaria CEU de Maxisterio, e cuxo obxectivo é preparar a 13 alumnos e alumnas para o desempeño de tarefas administrativas. Actualmente está en marcha un curso Preuniversitario, impartido integramente en Down Vigo, no que 8 estudantes adquiren as habilidades socio-laborais básicas para poder vivir a experiencia dunha inclusión real na contorna universitaria.
Ademais, co obxectivo de dar resposta ás inquietudes dos seus socios e socias, a entidade prepara a 15 opositores e opositoras para distintas convocatorias de emprego público con prazas reservadas a persoas con discapacidade. Esta formación compleméntase coa asistencia á Escola de Idiomas para obter o título CELGA.
Entradas relacionadas
