O emprego ordinario e a vida independente, claves de Down Vigo para a inclusión das persoas con discapacidade
A Asociación Down Vigo recibiu este venres un donativo de 1.443 euros, grazas a unha feira solidaria de libros organizada durante o mes de decembro na Escola Oficial de Idiomas da cidade olívica. O acto de entrega contou coa presenza Antonio Fortes e Jorge González, director e membro da xunta directiva de Down Vigo, respectivamente. A recadación foi entregada polo director da Escola Oficial de Idiomas de Vigo, Dionisio Martínez, e o vicedirector, Felipe Domínguez.
O evento, ao que tamén asistiron mozos e mozas membros da entidade, estivo amenizado polo grupo Os Guiris, proxecto musical do alumnado, ex-alumnado e profesorado da Escola Oficial de Idiomas de Vigo.
Down Vigo participa na iniciativa Café Solidario
Este donativo non foi a única iniciativa de carácter altruísta destas datas, xa que Down Vigo participou este sábado na cuarta edición do café Solidario celebrado na Praza da Princesa. Todas as persoas que se achegaron a esta cafetería sobre rodas puideron desfrutar, a cambio da entrega de alimentos non perecedoiros, dun café ou un chocolate servido por voluntarios e voluntarias da asociación.
Cada quilo de comida recollido será doado ao Banco de Alimentos de Vigo, que presta a súa axuda a máis de 6.000 persoas de toda a provincia de Pontevedra.
Entradas relacionadas
