O VII Campionato Internacional de Baristas Profesionais, que se celebrará en Foz o próximo 15 de febreiro, contará por primeira vez cun participante coa síndrome de Down.
Roberto Pereira, de Down Vigo, será a primeira persoa con discapacidade intelectual que competirá a nivel nacional nesta disciplina. Durante a súa actuación deberá preparar diversas elaboracións: catro expresos, catro capuchinos e catro cócteles sen alcol. E todo en menos de quince minutos.
O seu adestrador, o barista Marcos González (responsable do control de calidade en Delikia e campión de España 2018 en Fórum Café), reproduciu, co apoio de Down Vigo, as condicións nas que terá que competir Roberto, desde a máquina de café profesional ata o discurso inaugural. Ao longo de máis de seis meses foron practicando as distintas fases das elaboracións ata que a execución do seu exercicio lograse cumprir cos esixentes tempos e requisitos do Campionato.
O día da competición, Roberto non estará só. Un grupo de compañeiros e compañeiras de Down Vigo viaxará a Foz para acompañarlle nun autobús que Delikia dispuxo de forma gratuíta.
A próxima cita será o Campionato Nacional en Vigo
O próximo 16 de maio celebrarase na sede Afundación de Vigo o Campionato Nacional de Baristas organizado polo Fórum Cultural del Café. Durante esta cita, que durará varias xornadas, haberá diversas especialidades entre as que destaca ‘Barista Down’, na que participarán activamente varias persoas usuarias de Down Vigo.
