Unha ampla representación do grupo municipal do Bloque Nacionalista Galego, encabezada pola cabeza de lista Goretti Sanmartín, visitaron esta mañá as instalacións que a Federación Down Galicia e a Fundación Down Compostela teñen na cidade de Santiago.
A visita comezou cunha reunión cos principais representantes de ambas as entidades, nas que se puxeron de manifesto as principais demandas das entidades Down nos ámbitos educativo, laboral, sociosanitario e o da accesibilidade universal.
De entre os temas tratados, os representantes políticos deron especial importancia aos problemas que as persoas coa síndrome de Down e outras discapacidades intelectuais atópanse na súa etapa educativa e, posteriormente, no seu acceso ao emprego. E é que a maioría do alumnado con discapacidade con necesidades de apoio educativo non logra titular porque as adaptacións curriculares que se lles ofrecen nos centros non cumpren cos obxectivos mínimos do curso. Ademais, ante esta situación, os centros educativos non ofrecen ningún documento homologado que certifique o seu nivel de estudos e que lles permita seguir estudando ou desempeñar un posto de traballo.
Por outra banda, tamén se debateu sobre a importancia do emprego público e a necesidade de que as administracións locais se impliquen neste ámbito convocando un maior número de prazas acordes ao nivel de estudos e de preparación das persoas con discapacidade intelectual.
Unha vez terminada a reunión, os membros do BNG puideron coñecer de primeira man as actividades que levan a cabo diariamente nas instalacións da Fundación e a Federación.
Deste xeito, tiveron ocasión de charlar coas persoas usuarias da entidade, recibindo así as súas impresións e valoracións dos servizos que reciben, centrados no desenvolvemento integral das persoas coa síndrome de Down e outras discapacidades intelectuais e que teñen como obxectivo final a súa inclusión social.